Madreng kusinera

Saint Bernard, Southern Leyte -Si Sr. Jackie Clemencio, Franciscan, nagpasiugda og medical mission alang sa kabos nga mga molupyo sa Baybay, Leyte, diin siya magbase, uban sa mga doktor sa Chong Hua Hospital sa Sugbo, dihang nakadawat sa makapakugang nga kasayuran sa pagdahili sa usa ka bahin bukid sa Kan-abag nga nitabon sa tibuok Barangay Guinsaugon ug nilubong sa tanang mga molupyo. Tungod sa iyang lapad nga kasinatian pag-atiman sa mga biktima sa dagkong katalagman, apil nang mga naigo sa higanteng baha sa Ormoc City sa Leyte nga nipatay og kapin sa 6,000 niadtong Nobyembre 1991, gisugo si Sr. Jackie sa iyang kadagkoan pag-adto sa labing daling panahon sa St. Bernard.

Kusog ang bunok sa uwan dihang akong gikaila si Sr. Jackie sa Cristo Rey Regional High School nga giduma sa Franciscan Sisters, nga mao karoy nahimong labing dakong evacuation center sa mga biktima sa katalagman, kay silay nag-atiman sa 195 ka pamilya o 566 ka indibiduwal sa Guinsaugon nga, naluwas man tuod, apan nawad-an sa hapit tanang mga sakop sa ilang pamilya. Ang himsog nga bayhon ug kalantip sa sinultihan sa madre nakapakumbinser nako nga naa sa maayong mga kamot ang mga bakwet.

* * *

Gawas sa pag-atiman sa way kinutobang panginahanglan sa mga bakwet, si Sr. Jackie mao say tig-andam sa pagkaon sa gatosan ka mga sundawo sa Pilipinas, Estados Unidos, Taiwan ug Malaysia nga maoy nagduma sa kinatibuk-ang search, rescue ug retrieval operation sa napatag nga Guinsaugon. Wa niya pakyasa ang iyang mga kustomer.

Ang padayong kabaskog sa rescue workers bisan human sa upat ka adlaw sa budlay nga pagkubkob sa mabudhiong huyunghuyong, nga nisangpot gani sa pagsaulog dayong tikyop sa kangitngit gabii tungod sa kasayuran nga naluwas ang labing menos 50 ka tinun-an sa Guinsaugon Elementary School, masubay sa kusina ni Sr. Jackie.

* * *

Kinse ka sakong bugas humay ang lung-agon ni Sr. Jackie kada adlaw, taglima sa pamahaw, paniudto ug panihapon. Napugos siya pagpanghuwam sa labing dagkong kaldero ug kawa sa lungsod. Maabtan silag kapin sa tulo ka oras una makaluto.

Bisan sa kakugi ug katakos ni Sr. Jackie, dunay mga higayon nga nauwahi sila. Usa ka tingkaonan, gida na lang nilang mga kaldero ug mga kawa kay wa nay panahon pagbahin sa pagkaon. Hangtod karon, sama sa kinabag-an sa mga biktima sa pagdahili sa yuta, wa pa igkita ang mga kaldero ug mga kaha nga gikuninitan sa mga sundawo.

Apan kahibawo si Sr. Jackie unsaon pagkuha ang iyang gusto. Dihang nireklamo sa kahugaw sa command post, nahasiril-siril ang mga heneral pagpangitag mga baril sa basura. Tungod sa pakapin nga hudlat sa madre nga mohunong na siya pagluto kon di manlimpiyo ang kasundalohan.

[email protected]