Fans ni Yap

Wa magnihit og mga dumadapig si Heneral Adelberto Yap, ang kontrobersiyal nga general manager sa Mactan-Cebu International Airport Authority (MCIAA). Pipila nila nitambag nako sa di na lang pagtuki sa kakuwang og civil service eligibility ni Yap. Ang mahinungdanong alang nila mao nga natagbaw sila sa pagduma ni Yap sa tugpahanan.

Apan samtang kuwang na lag diyutay nga ituboy nila si Yap sa kapunaw-punawan, nagpakabanang mga kawani sa MCIAA nihatag nako og sukwahi nga hulagway. Matod nila dili ang kaayuhan sa mga Sugbuanon ang gustong ipatigbabaw sa MCIAA board sa ilang paglaban ni Yap kon dili ang kabuhong sa pipila lang ka mga tawo nga gipasanginlang naglaway nga makabahin sa multi-milyones pesos nga mga transaksiyon sa MCIAA.

* * *

Takos o dili si Yap sa katungdanan di maoy dugokan sa lalis. Ang balaod wa magmando nga mokuha siya og nominasyon gikan sa presidente kon dili nga kinahanglan siyang maghupot og career executive service officer (Ceso) eligibility. Nga giisip nga maoy batakang panginahanglan pagsukod sa iyang kahaom pagduma sa MCIAA - gawas nga mas matinud-anong sukdanan kay sa kalig-on sa politikanhong mga koneksiyon ug pagpaluyo sa sipsip niyang mga alalay.

Ang kaandam sa mga dumadapig ni Yap paglingiw sa paugat nga pagyatak sa balaod-giduphan nilang heneral bisan sa pagduda nga gilubag niyang charter sa MCIAA aron pagpilit sa katungdanan-way kalainan sa baliko nga lutsanan nga gipahamtang sa labing taas nga haligi sa nasud ngadto sa kinabag-an: Di siya angayng palagputon bisan sa kalig-on sa mga ebidensiya sa iyang pagtikas sa piniliay sa 2004 kay wa pay nitumaw nga takos nga ikapuli niya sa Malakanyang.

* * *

Di mapahiyos ni Yap ang kamahinungdanon sa Ceso eligibility kay siya mismo nikuha man sa pasulit sa Civil Service Commission (CSC). Ambot unsa katinuod ang sulti sa usa ka kasaligang tinubdan nga sa 200 ka pangutana 50 ray iyang natubag, apan ang di malalis nga kamatuoran mao nga nahagbong siya. Maong di maayong paminawon nga mangugat si Yap nga bahala nag pilay eligibility sa iyang karibal nga mga aplikante, ang mas mahinungdanan mao nga siya ray dunay nominasyon gikan sa presidente.

Angay sang pahinumdoman si Yap, nga giganahan na pag-ayo ug makigbuno na una mobiya sa iyang buhatan, sa mga sakop sa MCIAA board, nga wa pa gyod motagam bisan napaso na sila niadto sa susamang kalapasan sa gisabak-sabak sab nilang si Angel Verdan, ug sa presidente, nga linga sa mas dagkong raket apan ganahan lang mopahimutang sa iyang mga batabata, nga ang panginahanglan sa Ceso eligibility wa umola paglawgaw sa burukrasya-hinunoa, aron pagpalambo sa kaligdong ug katakos sa mga kawani sa kagamhanan ug pagpanalipod nila gikan sa makapagusbat nga pagpanghilabot sa mga politiko.

* * *

Email: [email protected]