Ilad sa CSCST?

Salamat nga wa pa diay undanga sa Visayas Ombudsman ang imbestigasyon sa mga pasangil sa dagkong anomaliya batok sa kadagkoan sa Cebu State College of Science and Technology (CSCST). Nakadawat ko og kopya sa suwat ni Direktor Virginia Palanca-Santiago, nga mao sab karoy officer-in-charge tungod sa kakulian sa panglawas ni Deputy Ombudsman Primo Miro, nga naningil na sa resulta sa nalangay na pag-ayong pagsubli sa Commission on Audit (COA) sa gikuwestiyon nga mga transaksiyon sa CSCST.

Si Sonia Dejacto, ang kanhi resident auditor sa CSCST Main Campus, nipahibawo ni Santiago nga nasumiter na niyang resulta sa audit sa makabungog nga honorarium nga giingong ilegal nga gikobra nilang Dr. Jose Sal Tan ug ubang tagduma sa CSCST gikan sa Enero 2004 hangtod sa Hunyo 2005 ngadto ni Atty. Roy Ursal, direktor sa Legal and Adjudication Office sa COA 7. Gitagalan ni Santiago si Ursal hangtod na lang karong semanaha pagsumiter ngadto sa Ombudsman sa opisyal nga baruganan sa COA pagtugot o pagdili sa mga transaksiyon.

* * *

Ang pagduda nga ang COA nangiyugpos lang sa mga pasangil batok nilang Tan ug kaubanan napuypoy dihang gitangtang sa COA si Dejacto gikan sa CSCST ug gibalhin sa laing eskuylahan sa gobyerno. Kay di tinuod maayong tan-awon nga si Dejacto ug ubang auditors, samtang nagpatoong independente nga nisubli sa mga transaksiyon sa CSCST, nidawat og teaching loads, laptops, cellular phones ug mga posisyon para sa ilang mga kadugo gikan sa mga tagduma nga maoy gipasanginlang nakahimog anomaliya.

Hinuon silang Tan ug kaubanan, bisan pa kon apikihon sa mga labaw nilang Dejacto, nangugat nang daan nga magpalaban sila sa nasudnong buhatan sa COA aron di na sila pugson pag-uli sa minilyon ka pesos nga honorarium sa mga serbisyo nga gawas nga nabistong wa diay nila serbisyohi gideklarar pa gyod sa Department of Budget and Management (DBM) nga di mahimong ilang panguwartahon. Nasuhitong silang Tan sa kalangay sa burukrasya ug klarong nanghinaot nga maunhan sa kalimot ang adlaw sa panudya sa ilang makauuwaw nga pagpahimus sa katungdanan.

* * *

Maong daghang naglaom nga mas paspas ang resulta sa imbestigasyon nga gipasiugdahan sa Board of Trustees (BOT), ang labing taas nga ahensiya nga maoy nag-umol sa mga lagda pagduma sa CSCST. Ang fact-finding committee nga naglakip sa mga representante sa DOST, Ched ug Tesda gipaabot nga motapos na sa ilang pakisusi karong buwana.

Hinaot nga di mailad ang mga imbestigador sa mga petisyon sa mga magtutudlo, mga tinun-an ug alumni nga gidudahang gipugos nilang Tan ug kaubanan. Ang isyu mao ang pagkolekta nila og mga benepisyo nga gidili sa balaod. Mapapas ba diay ning nangalisbo nga kalapasan kon makasalida silang Tan nga daghan pa silag fans?

* * *

Email: [email protected]