Nalubong buhi

Si Roberto "Agyot" Linga-Lingao nalubong sa nahugno nga minahan sa Atlas Consolidated Mining and Development Corporation sa Toledo City niadtong 1989. Nagpabilin siya sa ilawom-kapin sa usa ka libo ka tiil gikan sa ibabaw sa yuta-sud sa 13 ka adlaw ug gabii, gikan sa Hulyo 8 hangtod sa Hulyo 21. Iyang gikaon ang iyang sinina, giinom ang iyang singot, gikontrolar ang iyang paglihok ug paginhawa ug gilitok ang tanang nakat-onan nga pag-ampo sa Diyos aron mabuhi. Dihang natultolan sa iyang kaubanan, panit ug bukog na lang si Roberto. Pero buhi. Ug mas lig-on ang pagtoo sa labawng makagagahom.

Wa mosurender ang Atlas pagpangita niya tungod sa determinadong pagtoo sa iyang asawa nga dakong buhi si Roberto. Gipapahuway siya sa Atlas pero padayong gisuweldohan sud sa usa ka tuig hangtod nga nahibalik ang iyang naandang kahimsog ug panglawas. Serado nang labing dakong minahan sa Asya pero nagpabiling mapasalamaton si Roberto sa pagluwas ug pag-atiman sa Atlas niya ug sa iyang pamilya.

Nalab-as sa panumdoman ni Roberto ang talagsaon niyang kasinatian 16 ka tuig nang nilabay tungod sa pag-ulbo ug pagkahugno sa minahan sa bukirang barangay sa Dumalan sa Dalaguete. Nagbangotan siya para sa mga minero nga di sama niya ka-palaran.

* * *

Haskang paita sa kahimtang sa mga molupyo sa CP Batiller St. sa Umapad, Mandaue City: Kon mag-uwan, mosud ang taga tuhod nga baha sa itom ug baho nga lapok sa ilang kabalayan. Bisan way uwan, magbaha lang gihapong dan kay kanunayng mag-awas ang kanal sa tubig gikan sa kabalayan ug mga hugasanan og botelya sa bino. Pila na ka tuig silang nag-antos pero wa pa gyoy gihimo ang Mandaue City Hall pagsulbad sa problema.

Si Barangay Kapitan Zaldy Lumapas sa Umapad nipakita nakog mga dokumento nga niadto pang 2003 nagsige na siyag awhag sa City Hall pagsuhid sa lugar. Matod ni Lumapas duna na siyay gigahin nga P300,000 pag-ayo sa drainage pero di kasugdan ang trabaho hangtod nga kahimoan og program of work sa city engineer.

Hinaot nga ang problema sa mga molupyo sa Umapad wa yak-i sa Barangay Affairs Coordinating Office (Baco) nga klarong gitukod aron lang dunay trabaho ang anak ni Mayor Teddy Ouano nga si Jonkie. Kaluoy sa lehitimong mga panginahanglan sa mga barangay kon masangit lang sa kakuwang sa katakos ug naghinobrang pamolitika sa mga Ouano.

* * *

Gipasanginlan ang mga sakop sa Cebu SEA Games Organizing Committee (CebuSoc) nga nakapalit og luhong mga sakyanan. Gikatahong usa ni sa nakaaghat ni Cebu City Mayor Tomas Osmeña pag-apura sa kuwentada giunsa pagasto ang kuwarta gikan sa PhilSoc ug sa local government units.

Si Chairman Jonathan Guardo sa CebuSoc niangkon nga ang iyang Jaguar ug Pajero ug ang BMW ni Konsehal Boying Rodriguez napalit sa wa pay SEA games.