Alvin vs. Tommy

Alegre kaayo ang pagpadayon sa cross-examination ni ginang Margot Osmeña didto sa Municipal Trial Court in Cities (MTCC) kagahapon.

Gihugopan sa mga tawo ang sala ni MTCC judge Oscar Andrino kay si kanhi mayor Alvin Garcia mao may mipahigayon sa pag-cross examine sa asawa sa iyang higpit nga kontra sa politika - si Mayor Tomas Osmeña.

Kabahin kini sa kaso nga grave threats nga gipasaka ni Margot ngadto ni Jonah John Rodriguez, political supporter sa kanhi mayor, nga giingong maoy nagpadala og mga law-ay ug hulga nga mensahe ngadto ni Margot.

Miingon ko nga alegre ang cross-examination kagahapon kay gihulagway sa uban nga gitay-an na ang kanhi mayor sa pagpanglaban mao nga salikwaot na usahay ang iyang mga pangutana.

Ilabi na nga masabot kaayo sa pinangutan-anan ni Alvin nga siya may kasuko g'yod ngadto sa asawa sa iyang kontra sa politika.

Makapila ka higayon nga si Alvin gibadlong sa huwes kay nagbalik-balik ang iyang mga pinangutan-anan. Dihay higayon nga mihatag si Alvin og usa ka gutlo nga "break" sa pagpangutana ni Margot, apan giingnan siya sa huwes nga dili siya ang magbuot.

Dihay mga pangutana nga gibadlong si Alvin sa huwes kay ang saksi dili maoy tukma nga makatubag - sama pananglit kon unsang bahina sa gipadala kaniya nga text message nga nakalapas sa balaod.

Gipasabot ni judge Andrino nga dili na angay'ng pangutan-on ni Alvin si Margot sa maong matang sa pangutana kay ang korte ra maoy mohukom kon may balaod ba nga nalapas sa maong mga mensahe nga gipaagi sa text messages.

Gimandoan si Alvin nga usbon paghan-ay ang iyang mga pangutana, apan kataw-anan kaayo kay daw sa mao lang gihapon ang unod kay igo lang gilubag sa kanhi mayor ang pangutana.

Usahay god makapanglingo-lingo na lang tawon ang huwes. Si judge Andrino migahin g'yod unta - bisan pa og tibook adlaw kagahapon - alang ni Alvin nga makapahigayon og cross-examination ngadto ni Margot.

Apan bisan pa og nagliko-liko ang pinangutan-anan ni Alvin, milungtad lang og usa ka oras ang iyang pagsukit-sukit sa asawa sa mayor.

Mosamot pa g'yod kaalegre unya kay si Alvin, misugyot sa huwes nga sa pagsugod na nila og presentar sa ilang depensa karong Enero 20, 2006, buot niya nga ipresentar isip "hostile witness" si mayor Osmeña.

Apan abtik kaayong mipadayag og pagsupak ang mga abogado nila ni Tommy ug Margot. Supakon g'yod nila ang gitinguha sa kanhi mayor.

Ang usa sa argumento kagahapon ni Alvin mao nga walay bili ang dukomento nga nakuha nila ni Osmeña nga naglatid sa mga text messages gikan sa cellphone ni Jonah John kay dili man kini opisyal nga gikan sa cellphone network provider ang maong certification.

Buyno, depende na kana sa huwes ang paghukom. Nagplano usab ang kanhi mayor nga ang secretary sa barangay Calamba paatubangon usab nila kon ngano nga sila man maoy nag-isyu sa certification to file action nga gigamit sa pagpasaka sa kaso didto sa hukmanan.

Ang argumento ni Alvin mao nga walay katungod ang Calamba nga moisyu og certification tungod kay si Jonah John dili lumulopyo sa barangay Calamba.

Dunay balaod god nga gilatid sa Katarungang Pambarangay mao nga ang mga ginagmay'ng kaso, sama sa grave threat, ipaagi man g'yod sa mga sakop sa Lupong Tagapamayapa. Ug kay si Jonah John taga barangay Tinago man, adto usab unta didto ang certification gikan.

* * *

Dunay mipadala kanako og inpormasyon nga dunay polis ug traffic enforcer sa Carcar nga kusog mangilkil sa mga tigtumod og utanon.

Kaniadto, ang mga tigbaligya og kahayopan ang giingong sagad kilkilan aning maong mga polis ug traffic enforcer.

Ang mga utanon nga ikarga og mga trak gikan sa Mantalongon, Dalaguete nga itumod paingon sa Carbon, mao na sab kuno ang target niining mga tawhana.

Palihug kuno Mr. Texter 399, pakigkita kuno nako aron maestoryahan nato og maayo ang imong reklamo. Sayon ra na, aria ko sa opisina kay buhatan nato og project plan.