Hasi sa media

Ang pagpamakak, pagpanikas ug pagpangawat seryuso nga mga krimen. Labi na kon himoon sa usa ka lider ngadto sa katawhan nga iya untang gialagaran. Mao ni hinungdan nga dako kaayo ang atensiyon nga gihatag sa media ngadto sa mga pasangil nga namakak, nanikas ug nangawat si Pres. Arroyo.

Inay kalawaton sa presidente nga lehitimo ang pagsunod sa media sa mga pasangil batok niya, lain ang iyang sabaw. Human gisuwayan pagpalit ug paghaylo ang mga sakop sa media-nga ang pipila nahalin gyod-nidangop siya sa paghudlat nila. Ug kay wa man sab magsilbi, nisuway na lang siya pagtudlo sa media kinsay pakighinabian ug unsay balita nga suwaton.

* * *

Ang mga pasangil sa pagpamakak, pagpanikas ug pagpangawat di matubag pinaagi sa paglikoy sa istorya ug pagsumbalik paglabay og lapok. Segurong magpabiling buhi ang mga pagduda, dili tungod sa kamahigugmaon sa media sa mga eskandalo ug daotang mga balita, kon dili tungod sa pagpaugat sa presidente paghatag og makatagbaw nga katin-awan pagpanalipod sa iyang kaugalingon.

Di mapugos sa presidente ang media pagsige og aleluya nga naabsuwelto na siya human gibasura ang impeachment complaint batok niya. Kay di man sila mahimong molingiw sa laing makauuwaw nga kamatuoran sa iyang pagsuburno sa mga kongresista ug pagsabotahe sa institusyon nga mao untay gitugyanan pagsusi sa mga pasangil batok sa di-makiha-sa-korte nga mga opisyal sa gobyerno.

* * *

Sa di pa manudlo ang presidente unsay responsible journalism, angay una siyang makat-on sa duha ka labing dagkong krimen sa media:

• Una, ang pagsabwag og sensitibong mga kasayuran bisan way gihimong pakisusi. Ang pagtukob dayon sa presidente sa kasayuran nga gilawog ni PNP Chief Arturo Lomibao nga nadakpan nang lider sa mga bandidong Abu Sayyaf maoy labing bag-ong pananglitan ini; ug

• Ikaduha, ang paghimog seryusong pasangil bisan way klarong ebidensiya. Ang labing bag-ong kalapasan sa lagda mao ang pagtulisok sa presidente ni Julius Babao sa ABS-CBN bisan taphaw kaayong kasayuran nga iyang nadawat gikan sa ISAFP.

Ang kalainan sa pasangil sa presidente batok ni Babao ug sa mga pasangil sa oposisyon batok niya mao ang gibag-on sa mga dokumento ug gidaghanon sa mga saksi nga andam momatuod sa pamakak, panikas ug pangawat sa presidente ug sa iyang pamilya, nga iyang malampusong nalugpitan pinaagi sa kaliboan ug usa ka maniobra.

* * *

Ang binayran ug iresponsable rang mga sakop sa media ang molingiw sa mga pasangil sa pagpamakak, pagpanikas ug pagpangawat sa presidente. Ang responsableng media padayong motuki sa kontrobersiya hangtod nga kahatagan og makatagbaw nga kinutoban.

Nga di mahitabo kon ang pagpamakak, pagpanikas ug pagpangawat dugangan sa mas bangis nga mga krimen sa pagpanlugpit sa katungod sa katawhan sa pagpakisayod ug sa pagpanghasi sa mga mensahero.