Nagbutyag kini sa binuang sa usa ka polis ug sa upat niini ka mga kauban nga gituohan nga pulos usab polis nga nadistino sa probinsya sa Sugbo.
Wala ko'y tinguha nga dauton ang maong polis, ilabi na nga nasayod ako nga hapit na kini moretiro sa serbisyo.
Apan sahi sa akong gibalik-balik sa makadaghang higayon, maglagot ko nga maghuna-huna sa mga tinugyanan sa balaod nga magbinilyako.
Moingon ko nga bilyako tungod kay abtik kaayo kining mangayo og bahin gikan sa mga nagpasiugda sa illegal nga mga sugal. Unya kon dili mahatagan, sakmiton dayon ang illegal nga butang unya dili dad-on ngadto sa ilang buhatan.
Ingon niini ang gihimo sa usa ka polis nga nadistino sa Cebu City police office kaniadto, diin kusog kaayong manakmit og mga video karera, unya dad-on ra sa ilang balay, hangtud nga siya nahimo usab nga operator sa maong illegal nga sugal.
Pila may sugilanon, miabot ra g'yod ang gaba kaniya, nakapusil ug nahukmang sad-an sa pagpatay sa iyang silingan.
Sa ako na nga gibalik-balik pagpasabot nga kon manakop ang usa ka polis kinahanglang ipresentar gayod ang inyong mga nasakmit nga butang. Ayaw ninyo og tagoi dayon kamo na usab ang mo-operate.
Basi hinoon sa gisugilon sa duha ka mireklamo nako, akong natimbang-timbang nga ang silingan nilang polis walay direkta nga kalabotan pagsakmit sa ilang sugalan nga naglangkob sa duha ka moli-moli kaniadtong miaging Lunes.
Apan sa wala pa sakmita ang maong mga moli-moli, kadtong upat ka tawo nga nagpaila nga polis, nakit-an nga didto nag-inom sa balay sa polis nga silingan sa duha ka complainant.
Nasayran nako nga ang maong polis, tigpangayoan og kwarta gikan sa maong tigpasiugda sa illegal nga sugal. Sa ako nang giingon, malooy ko nga makabaton ka og kaso Mr. Policeman kay basin og mahasol ka pagkobra sa imong retirement benefits.
Ang ako lang, magtinarong g'yod unta ka tungod kay isip polis, modelo kamo og maisip nga sumbanan sa katawhan. Unsay gusto nimo, ang imong mga binuang maoy gusto nimong sundon sa umaabot nga mga polis?.
Pwerteng nakapanghimakak sa polis dihang akong gisukit-sukit, apan ang mga complainant nga iya rang mga silingan positibo nga miila kaniya nga maoy tigpangayoan og kwarta gikan sa kita sa illegal nga sugalan.
Ang pagpanghimakak sa polis sa pasangil sa iyang mga silingan, wala g'yoy basihanan. Wala sila magkakontra ug walay kaisog ang mga sibilyan nga mobutang-butang og sala sa usa ka polis kon dili man tinuod nga nakahimo siya og salaod.
Sa daghan nang mga hukom sa Korte Supreme sa mga kaso, ang labaw'ng hukmanan nagkanayon "A positive identification versus a mere denial, the positive identification will prevail."
Unsaon? Kon ang mga ahente sa National Bureau of Investigation mangayo kanila og dukomento, ihatag dayon nila nga dili langan-langanon.
Gihinabi nako kagahapon si NBI senior agent Renan Oliva og akong nasayran nga nangayo siya sa mga opisyal sa City Hall og kopya sa mga employment records sa mga kawani nga nadistino sa business permit section.
Usa kini sa paagi nga mahibaw-an kon kinsa kadtong mga tawo nga responsable sa pag-isyu og mga fake nga business permit ngadto sa mga tag-iya og balay-patigayon, unya ang bayad gibulsa ra sa maong mga mapahimuslanon.
Nasayod ko nga kadtong mga nalambigit niining maong binuang, gitugkan na karon og mga hubag-hubag ug dili na makatarong og katulog nga maghayang.
Kining mga tawhana, maayo lang pangsingkion ang ulo ug niadtong Rosalina Badana nga cashier sa City Hall kaniadto nga nakadispalko og kapin sa P18 milyones, ug karon hingpit na nga nahanaw.