Protesta sa CSCST

Magprotesta ang nagpakabanang mga kawani, mga magtutudlo ug mga tinun-an sa Cebu State College of Science and Technology (CSCST) karong Lunes batok sa gipasangil nga mga eskandalo batok sa kadagkoan sa eskuylahan nga gipangulohan sa presidente nga si Dr. Jose Sal Tan. Ang 12 ka oras nga protesta magsugod sa alas-8 sa buntag ug maglakip sa ilang pagsul-ob og itom ug pagpangaliya ug pagdagkot og mga kandila. Nangolekta sab sila og mga pirma para petisyon nga nagdetalye sa ilang mga reklamo, sa ingon: • Mauwaw na silang Tan ug kaubanan sa pagpadayon sa gipasangil nga pangabuso ug pagpahimus nila sa katungdanan; ug •Paspasan sa Visayas Ombudsman ug ubang ahensiya ang pagtiwas sa imbestigasyon sa gibistong kahiwian ug pagsilot sa mapamatud-ang responsable.

* * *

Usa ka posibleng katin-awan sa kamahiligon nilang Tan ug kaubanan pagkuha og daghang kurso, gawas sa pagpataas pa sa kutay sa mga titulo nga mosunod sa ilang mga ngan, mao ang study aid nga sila ra say nag-umol: P15,000 para sa kada masteral degree ug P20,000 sa kada doctoral degree. Sa ato pa, dihang nigradwar silang Tan ug kaubanan sa duha ka kurso niadtong Hunyo 10 sa Mandaue City campus, kada usa nakadawat og labing menos P35,000.

Kon akoy pahimuon og slogan sa raket nga gipasangil batok nilang Tan ug kaubanan sa CSCST, kining mosunod ang akong isugyot:

•Gawas sa libreng pag-eskuyla, suweldado pa!;
•Estudyante na, magtutudlo pa!;
•Estudyante'g magtutudlo magdungan og paso pagkuha sa ilang diploma, tinuod nga simbolo sa demokrasya!;
•Mahal ang tubig, kuryente ug gasolina, mayo na lang sa CSCST kay nagkabarato ang diploma; ug
•Maka-diploma bisan di motunga, may cash bonus pa!

* * *

Laing kahibudngan mao nga ang main campus sa CSCST dunay tulo ka registrars. Kinsa man nila ang naghupot sa mga dokumento sa daghang mga kurso nilang Tan ug kaubanan? Kasaligan nakong tinubdan nagbutyag nga ang sinaligan rang Tan ang nagkupot sa mga dokumento aron nga di si bisan kinsa ray makatan-aw. Laing giingong anting-antingan sa CSCST mao si Dr. Dominador G. Surbano sa Camotes campus. Gipasanginlan siya nga atol sa iyang pagkuha sa iyang doctoral ug masteral degrees sa main campus, nga ang mga klase kada Sabado ug Domingo, nalista sab nga nagtudlo siya sa evening program sa Camotes, ug ang iyang schedule, nakatag-an mo, Sabado sab ug Domingo. Padayon sang nireklamo ang mga magtutudlo nga hangtod karon wa sila pakit-a sa ilang payroll sa evening program. Gireklamo sab sa mga tinun-an ang giingong pagtukod og luho nga PRT gym, nga gihingpit sa tanang mahalong ekipo, nga ang makagamit sila rang Tan ug kaubanan, samtang way tubig ang mga pansayan, way lingkoranan ang classrooms ug nagtulo ang mga atop.

* * *

Email: [email protected]