Dakpa kon magtaptap sa nawong

Husto g'yod kaayo ang lakang sa mga konsehal sa dakbayan sa Sugbo nga dakpon kadtong mga tawo nga magsul-ob og maskara nga magsakay og motorsiklo. Maayo man gani nga iapil kanang mga tawo nga magsuroy-suroy diha sa karsada nga magsul-ob gihapon og maskara.

Dili imposible nga mga dautang tawo kining mga magtaptap sa ilang panagway nga magsakay og motorsiklo. Kon pasagdan usab nato kining mga tawo nga maglakaw-lakaw diha sa karsada nga magmaskara, peligro kon sakyan kini sa mga dautan.

Nakakita ba kamo nianang mga tawo nga maninda og tubig, sigarilyo ug sunglasses nga maglakaw-lakaw diha sa karsada unya nagtaptap sa ilang panagway? Kon ibutang nato nga kining mga tawhana nagpaabot lang og higayon sa paghimo'g krimen, mailhan kaha sila?

Mas nindot gayod nga dunay ordinansa nga magdili ni bisan kinsa sa pagsul-ob og mga maskara o bisan unsa nga taptap sa ilang panagway kon anaa sila sa publikong mga lugar. Dili kini usa ka kalapasan sa tawhanong katungod.

Apan mas labing maayo g'yod unta nga dili kay ordinansa lang ang mugnaon nga magdili sa pagsul-ob og maskara diha sa publikong dapit, kon dili kinahanglan g'yod unta nga dunay nasudnong balaod kabahin ani.

Dihay higayon, taud-taud na hinoon kini nga akong nasaksihan. Kaadlawon kadto og nagsakay ako niadto og motorsiklo paingon sa Barili. Pag-abot nako sa Carcar, may laing motorsiklo nga dunay duha ka tawo nga nagsakay, miampad nako.

Bisan og may pagka ngitngit pa niadtong higayona, apan nasigpatan dayon nako nga ang nag-angkas sa motor og nagsul-ob og bonnet - kana bang mata ug ilong ra ang makita - nagbitbit og M16 Armalite rifle.

Ayaw na lang kamo pangutana kon nganong makaila ko og M16 Armalite rifle ug ubang matang sa armas kay police reporter ko sulod sa kapin sa napulo ka tuig.

Pananglit og kadtong mga tawhana mga kriminal pa, unya gikalitan ko og pusil, masulbad kaha ang krimen bisan og duna pay makakita?

Na-dismiss man gani ang kaso nga gipasaka batok sa usa ka polis nga giingong mipatay ni Alden Abi-abi kay ang rason mao nga ang nagpusil nagsul-ob kuno og helmet atol sa pagpamusil.

Dili maayong gamiton nga rason ang pagsul-ob og bonnet o ubang matang sa maskara kay mahadlok sila nga moitum. Taphaw ra kaayo kana nga rason uy.

* * *

Angay gayod nga pasakaan og kaso sa City Hall ang tagdumala sa mga balay-patigayon nga gitoohan nga mihimo og pagpaniubra aron dili sila makabayad og buhis sa dakbayan pinaagi sa paghimo-himo og piki nga permit.

Maoy akong pagtoo nga ang porma sa mga business permit nga gisundog ra ang mga pirma sa mga opisyal sa City Hall, gipalusot kini sa mga mapahimuslanong kawani sa dakbayan sa Sugbo.

Kini maoy angay nga sutaon ni Mayor Tomas Osmeña og kon mamatud-an, iya dayong pahamtangan og silot.

Kagahapon, tulo ka balay-patigayon ang gipatak-opan ni Mayor Osmeña kay nasakpan nga nag-operate nga walay business permit. Ang nakita sa mga sakop sa revenue task force nga gigamit sa maong mga balay-patigayon mga "fake" nga business permit.

Mao kini nga gawas sa posibleng multa nga ilang atubangon, hayan mapasakaan pa gayod sila og kasong kriminal nga mao ang paglapas nila sa Article 172 sa Revised Penal Code kon falsification of documents.

* * *

Migrabe na usab kuno pagbalik ang pagpamaligya og shabu diha sa sitio Caduloy, sakop sa barangay Tisa. Palihug mga polis nga nadistino sa Punta Princesa Police Station, hatagi og aksyon kining maong reklamo.

Matud sa akong informer, ang usa sa mga pushers diha nagdala sa angga nga Rommel. Duna pa to'y tinun-an sa criminology. Di gani mo mohunong aw madakpan g'yod mo sa dili madugay.

* * *

Daghan ang mipadala nako og text message nga nagmahay nganong wala nila tumana ang akong awhag nga mopahimulos sa amnesty sa pagpalisensya sa ilang mga armas.

Ana g'yod na, mauwahi man ang pagmahay. Sagdi lang, kay napupos na man ang amnesty, pagpaabot na lang sa sunod. Kadtong nakapalisensya ubos sa amnesty, magpaabot na lang nga maaprobahan ang ilang application.