Ilad ang konseho?

Ang Syudad sa Lapulapu nihunong pagpamalit og mga kemikal ug fogging machines batok sa dengue unom ka tuig nang nilabay. Ang Lapulapu City Health Department nitingob sa ilang atensiyon sa pagpanglimpiyo sa mga lugar nga tagoanan ug itloganan sa mga lamok. Gihimo ni nila sa tibuok tuig, sa way pagpaabot sa mga buwan nga tinguwan kanus-a mosulbong pag-ayo ang mga kaso sa dengue.

Ang resulta? Ang pagsaka sa mga kaso sa dengue sa Lapulapu maoy usa sa labing mubo sa tibuok Sugbo ug sa rehiyon kon itandi sa niaging tuig. Ug way bisan usang namatay. Lahi sa Syudad sa Sugbo. Human nigasto og minilyon ka pesos sa pagpangompra og daghang kemikal ug mist spray machines, dul-an na sa 800 ang na-ospital ug 21 nay patay tungod sa dengue.

* * *

Aron pagmatuod nga wa sila magpabaya sa pagtugot sa pagpangompra sa kemikal, giwara-wara ni Cebu City Vice Mayor Michael Rama, ang presiding officer sa Cebu City Council, ang report sa Committee on Parks and Playground, Wildlife, Ecology and Environmental Management nga nisuporta sa transaksiyon. Ang report maoy gibasehan sa mga konsehal pag-aprobar sa resolusyon ni Konsehal Christopher Alix nga nigahin og P1.5 milyones para sa kemikal atol sa ilang sesyon niadtong Pebrero 23 ning tuiga.

Ang gitun-an sa komitiba nga gipangulohan ni Konsehal Nestor Archival mao ang Aqua-Resigen chemical, nga ilang gihulagway nga dunay lima ka hazardous ingredients ug busa kinahanglang tarungon pagamit aron di makahilo sa mga tinubdan sa tubig ug makadaot sa kalikopan ug panglawas sa mga molupyo. Aqua-Resigen sab ang giaprobahan sa mga konsehal nga paliton.

* * *

Unsa man karoy buhaton nilang Rama ug sa mga konsehal nga inay Aqua-Resigen, ang mas makahilom man hinuon nga lambdacyhalothrin maoy gikompra? Kinsa may nagbuot nga di tahuron ang purchase request ug ang resolusyon sa City Council para sa aqua-resigen?

Nganong wa man sultihi ni Alix ang iyang kaubanan nga mas makahilo nga kemikal ang komprahunon? Hadlok ba siyang isalikway sa komitiba ni Archival ang transaksiyon? Nganong gitugotan man sa Bids and Awards Committee kining klarong palusot?

* * *

Atol sa ilang sesyon gahapon, ang mga konsehal nagkauyon sa pag-awhag sa Visayas Ombudsman pag-imbestigar sa mga pagduda sa kahiwian sa pagpangompra sa kemikal. Mas mapuslanon ning maong lakang kay sa ilang paghudlat nga ikiha kog libelo tungod sa akong pagtawag sa ilang atensiyon nga posibleng nalutsan silag anomalusong transaksiyon.

Mas maayo sang di silay mangunay pag-imbestigar sa kaso aron nga makalingkawas sa bisan unsang pagduda sa maniobra tungod sa ilang kasuod sa usag-usa. Labaw sa tanan, hinaot nga naleksiyon nang mga konsehal nga ilang katungdanan ang pagkutikuti sa tanang transaksiyon, bahala nag gipasiugdahan sa ilang mga kauban sa kaon ug inom kada human sa sesyon.

* * *

Email: [email protected]