Di ingon nato

Samtang nagkadugay ug nagkainit ang eskandalo sa pakig-istorya ni Presidente Gloria Macapagal-Arroyo ni kanhi Comelec Commissioner Virgilio Garcillano pinaagi sa telepono aron pagmaniobra sa resulta sa eleksiyon sa Mindanao sa Mayo sa niaging tuig, nagkadako ang akong pagtoo nga dunay puwersa nga di ingon nato nga naglihok aron pagpalagpot ni Presidente Arroyo sa katungdanan.

Kay unsa may laing katin-awan sa mosunod nga kahibulongan nga mga panghitabo:

o Ang pagtumaw sa tape recording usa ka tuig human sa eleksiyon nga, bisag uwahi na, bisag nakuha sa ilegal nga paagi ug bisag gikatahong gipanguwarta ni T/Sgt. Vidal Doble sa ISAFP, nakapahibawo sa publiko sa labing unang higayon giunsa pagmaniobra ang resulta sa eleksiyon sa labing taas nga ang-ang sa gobyerno ginamit ang kahimanan sa Malakanyang, Comelec, militar, kapolisan ug ubang ahensiya;

* * *

•Pagkabisto sa pipila ka bahin sa Garci tapes nga nagpakita nga gawas sa iyang labing dakong krimen pagbudhi sa nasud, gibukobuko sab sa presidente hastang iyang suod nga politikanhong mga alyado, nga nakapasuko sa labing menos duha nila: Si Kongresista Clavel Asas-Martinez sa Sugbo nga nipirma na sa impeachment complaint ug kanhi gobernador Faustino Dy Jr. sa Isabela nga gikatakdang mobarug sa pasangil nga gisaksihan sa presidente sud sa iyang bay sa La Vista, Quezon City ang pagsuburno sa mga opisyal sa Comelec ginamit ang payola sa jueteng; •Pagtumaw nilang Sandra Cam ug ubang saksi nga bisan sa ilang pagkagumon sa jueteng ug ubang ilegal nga kalihokan nakahimo pa gyod paglambigit sa bana, anak ug bayaw sa presidente sa higanteng raket sa ilegal nga sugal;

* * *

•Pagpakita ni Michael Angelo Zuce, kawani sa Malakanyang ug pag-umangkon ni Garcillano, kinsa lahi ni Cam, nakahikyad og mga dokumento gawas sa iyang testimoniya pagdason sa pagduda nga ang payola sa jueteng maoy gigamit ni Presidente Arroyo pagsurikbot sa eleksiyon ug pagkawat sa mandato sa mga botante; ug •Ang way kinutobang palpak sa Malakanyang-gikan sa pamakak ni Press Secretary Ignacio Bunye ngadto sa peke nga pagpangayo og pasaylo sa presidente nga niresulta sa resignasyon sa iyang labing sinaligang mga sakop sa gabinete.

* * *

Email: [email protected]