Babaye ni Garci?

Kon nakalahutay kag paminaw sa tulo ka oras nga tape recording sa pakig-istorya ni kanhi Comelec Commissioner Virgilio Garcillano uban nilang Presidente Gloria Macapagal-Arroyo, First Gentleman Mike Arroyo, kanhi senador Robert Barbers, Kongresista Gerry Espina ug ubang personalidad, nakaseguro kong imong nabantayan ang daghan niyang ngan ngadto sa mga nanawag niya gikan sa Mayo 17 hangtod sa Hunyo 18, 2004:

o Garci siya parang Presidente Arroyo sa kataposang duha sa 15 nila ka panagsulti;

o 'Di (Daddy) siya para sa iyang asawang si Grace;

o Sir ug Kuya siya para sa babayeng nangayog load sa cell phone ug gikasabot niyang ikaabot;

o Pare ug Padre siya parang Mike Arroyo;

o Gil, 'Dong, Tito ug 'Kol para sa iyang mga paryente; ug

o Comm, Tatay, Manong ug Boss sa iyang mga sakop.

* * *

Ang recording nagpintal sab sa papel sa asawa ni Garcillano sa iyang trabaho ug personal nga kinabuhi:

o Si Grace nitabang paghikay sa duha ka transaksyon pinaagi sa pagpaila sa mga kandidato ngadto sa iyang bana;

o Si Grace nibuyag niya sa di pag-inom kay udto pa ug niapura niya pagbalik sa upisina aron di matental sa inom (wa siyay kasayuran nga niadtong higayona may gikasabot si Garcillano nga batan-ong babaye nga iyang ikaabot sa alas-2 sa hapon);

o Si Grace gilibak sa iyang bana nga "puti og buhok" dayong balibad sa batan-ong babaye nga makigkita unta niya;

o Si Grace nagsusi unsay gilutong sud-an para sa iyang bana (gisultihan siya sa usa ka Len nga "ulang");

o Si Grace nakigdungan niyag simba aron di magbalikbalik ang ilang sakyanan;

o Si Grace nabalakang di matudlo pagbalik ang iyang bana sa Comelec samtang nakigsabot sa iyang amiga nga mag-abot sila sa Sugbo para sa ilang biyahe sa gawas sa nasud; ug

o Si Grace ganahang mag-shopping sa Greenhills.

* * *

Ang kataposang istorya ni Garcillano sa recording nahimo sa alas-6:08 ug alas-8:07 sa buntag niadtong Hunyo 18 uban ni "Boy" nga giila sa Newsbreak nga si Acting Regional Director Renato Magbutay sa ARMM (kinsa nadestino sab sa Sugbo pila ka tuig ang nilabay). Sa unang istorya, gisugo niya si Boy pag-text sa presidente kinsa iyang giingong nakadawat og text nga way ngan sa niaging gabii. Wa matiwas ang istorya kay naputol ang linya.

Sa ikaduha nilang istorya, gihatagan niya si Boy sa numero sa presidente (0917-8547146) ug niawhag nga, "Please assure her that we never forsake her…" Nagkatawa siyang nipuno, "Ay na tog usba ang imong sulti nga kon di ko ma-renew, duna tay 25 ka election officers nga star witnesses."

Way usa ka buwan human niadto, si Garcillano gitudlo pagbalik ni Presidente Arroyo sa Comelec. Na-blackmail bang Garcillano ang presidente?

* * *

Email: leo_lastimosa@abs-cbn.com