P3.9M pundo alang sa Sports Festival sa probinsiya
CEBU, Philippines — Ang Cebu Provincial School Board (PSB) miaprobar sa P3.9 million nga pondo alang sa Cebu Provincial Sports and Cultural Festival karong tuiga.
Ang maong kalihokan ipahigayon sa siyudad sa Naga karong Pebrero 9-14 diin ang Department of Education (DepEd) mogahin usab og P3.7 million.
Moabot sa 24 ka sports categories ang mahimong maapilan sa mga atleta ug 10 usab ka cultural nga kompetisyon ang gikatakda alang sa pagpakita og talento ug kahanas sa mga tinun-an sa probinsya.
Ang maong pondo giaprobahan human gipirmahan ni Gobernador Gwendolyn Garcia ang budget request nga gisumiter ni Dr. Senen Paulin, ang Cebu Provincial Schools Division Superintendent atol sa ilang tigom niadtong Enero 28.
Gamiton kini aron igasto sa pagkaon, snacks ug uniforms sa 1, 410 ka mga personel nga maoy modumala sa maong kalihokan lakip na sa working committee.
Ang maong sports ug cultural meet gipaabot nga langkoban sa 16, 358 ka mga partisipante lakip na sa mga atleta, coasches, technical staffs ug committee members gikan sa 44 ka mga local government units sa Probinsya sa Sugbo.
Sumala ni Paulin nga mas daghan ang partisipante karong tuiga itandi sa niaging tuig nga miabot ra sa sobra 6, 000 diin mas daghan ang atleta nga moapil ug ang mga LGU naghinamhinam usab sa pag-apil.
““They have been encouraged; and let us also take note nga kining participation nila is endorsed ni sa ilang mayor. Meaning to say, their mayor even is interested,” sumala ni Paulin, sa taho Capitol Information Office.
Ang makadaog karong tuig maoy morepresentar sa Probinsya sa Sugbo sa umaabot nga Central Visayas Regional Athletic Association (CVIRAA). (BANAT NEWS)
- Latest
