Assault rifle, 3 baril nasamsam sa bahay sa Maynila
MANILA, Philippines — Nasamsam ng mga tauhan ng Manila Police District-Sta. Ana Police Station ang isang assault rifle at tatlong handgun sa inabandonang silid ng isang tenant sa Sta. Ana, Maynila nitong Enero 30.
Isinalang sa ballistic examination ang mga kinumpiskang M16 rifle, isang caliber .40, dalawang unit ng calibre 45 at mga magazines na punong-puno ng mga bala.
Pinasok ng mga tauhan ng Sta. Ana Police sa pangunguna PLt.Col. Dionelle Brannon noong Enero 30, 2025 ang kuwartong inokupa ng suspek na si alyas “Roger” sa apartment na matatagpuan sa Suter Extension, Sta. Ana, Maynila matapos magpalabas ng search warrant ang Manila Regional Trial Court Branch 18.
Sa panayam kay Col. Brannon, hepe ng Sta Ana Police (Station 6), nag-ugat ang pagkadiskubre sa mga baril nang ireport ng mga residente at barangay officials ang naganap na komosyon alas-3:40 ng madaling araw noong Enero 14, 2025, sa labas ng nasabing apartment.
Isang grupo umano ng kalalakihan ang nakaparada sa labas ng apartment nang may dumating din na grupo ng kalalakihan at nagkaroon ng tutukan ng baril hanggang sa makatakas ang grupong kinabibilangan ng tenant.
Kasunod nito ang pagpasok umano ng isang lalaki sa kuwarto ng tenant na posibleng hindi nai-padlock ang pinto.
Bunga aniya, ng naidulot na tensyon ng nasabing komosyon, inireport ng mga residente sa awtoridad dahilan upang makipag-ugnayan sa may-ari ng apartment ang pulisya at barangay officials sa pagpasok sa apartment.
Bumungad sa kanila ang mga kagamitang kalat-kalat at sa isang laundry basket ay nakita ang isang M16 na kinunan lang ang serial number para sa verification.
Nakita rin sa ilalim ng laundry basket ang iba pang mga baril at maraming mga bala.
Natuklasan na ang M16 ay nakarehistro sa ibang pangalan na hindi naman sa mismong tenant at patuloy pang iniimbestigahan kung paano napunta doon habang ang iba pa ay patuloy na inaalam kung nasangkot sa pagpatay o pamamaril.
Ani Brannon, hindi na lumulutang ang pakay na tenant simula noong Enero 14. Napag-alaman din niya sa may-ari ng apartment na taong 2023 pa nangungupahan si alyas Roger kasama ang asawa at anak at noong Disyembre 2024 ay hindi na nakita ang mag-ina doon.
Patuloy pa ang imbestigasyon sa background ng tenant upang matukoy kung may kinaanibang grupo o sindikato at kung anong iligal na aktibidad ang kinasangkutan, gayundin ang imbestigasyon sa intruder na pumasok sa unit nito, na posibleng may atraso ang tenant.
- Latest
