‘Pugad’ ng online lending ni-raid ng NBI, 117 timbog

MANILA, Philippines — Arestado sa pagsalakay ng National Bureau of Investigation (NBI) ang nasa 117 Pinoy na naaktuhan naniningil, nananakot at nagpapadala ng mga pagbabanta sa mga may utang sa online lending applications hub sa Makati City, nitong Biyernes.

Magkasanib na pinasok ng mga ahente ng NBI at Presidential Anti-Organized Crime Commission (PAOCC) ang mismong working stations gamit ang search warrant, kung saan ­inabutan ang operasyon ng mga manggagawa na nasa harap ng mga computer habang nakikipagtransaksyon sa mga kliyente.

Nakita rin ng mga awtoridad sa tabi ng mga desktop ang mga listahan ng mga kliyente na may due dates na at may mga script din sa pang-eengganyo sa mga target na kliyente.

Bago ang operasyon, ang United OLA Victims Movement, isang Non-Governmental Organization na tumutulong sa mga na-harass na customer ng mga online lending company, ay nag-ulat sa PAOCC noong Oktubre 2024 tungkol sa mapang-abusong mga taktika sa pangongolekta at mga mapanlinlang na gawi ng mga online lending application, CREDIT CASH, at PESOWALLET .

Sinabi ng mga nag­rereklamo na naranasan nila ang labis na mga rate ng interes at mga nakatagong bayarin, na naging dahilan upang sila ay nahihirapang bayaran ang kanilang mga utang.

Modus  ng mga suspek ang paghahanap ng  mga biktima sa pama­magitan ng TikTok at iba pang social media, na nag-aalok ng collateral-free na mga pautang na hanggang 25,000 pesos ($428).

Ang mga nanghihiram ay sinisingil ng 35% lingguhang interes at ang mga hindi makapagbayad ng obligasyon ay hinaha­rass, pinahiya at pinagbantaan na ipagkalat ang kanilang personal na impormasyon online.

Ito ang nagtulak sa PAOCC na makipag-ugnayan sa NBI at SEC para buuin ang kaso, na kalaunan ay nagresulta sa joint law enforcement operation na ito.

Sa kabila ng pagtanggi ng mga manggagawa, sila ay ipaghaharap ng reklamong grave threats at harassment habang patuloy pang inaalam kung sino ang may-ari ng mga lending apps at kung may kaugnayan ito sa POGO.

Kabilang sa reklamo ang kaso ng isang kliyente na nangutang lamang ng P2,000 at dahil sa isang linggong palugit sa bayarin na may malaking interes, napasubo siya na umutang ulit sa ibang online apps upang makabayad kaya nagkapatung-patong umano ang utang at patung-patong din ang mga natatanggap na pananakot.

Isa ring babaeng biktima ang nagpatunay sa mga awtoridad na pinagbantaang huwag lalabas ng bahay dahil babarilin ang bao ng ulo at huwag pipikit at kung hindi ay mamamatay siya.

“Marami na pong nagtatangkang magpakamatay. Marami na rin pong nagpakamatay. Nasira ‘yung buhay, nagkaroon ng depression,” ani  NBI-Anti-Organized and Transnational Crime Division (OTCD)  Agent-on-Case Attorney Ric Espino.

Bukod sa pagmumura at pananakot, pagsasapubliko ng mga impormasyon at nadamay din umano ang kapamilya ng kliyenteng bigong makapagbayad, na paglabag umano sa Securities and Exchange Commission Memorandum Circular No. 18 Series of 2019, o “Unfair Debt Collection Practices” of finan­cing and lending companies.

“May possibility na yung mga dating nag-o-operate ng POGO ay nag-switch na sa ganitong scamming. May mga nahuli na kasi tayo before na ang nagpapatakbo ay mga Chinese national. ‘Yung mga una naming na-check ay mga grupo rin sila ng mga magpo-POGO eh. Kaya lang mas tago sila dito,” ani PAOCC Executive Director Gilbert Cruz.