‘Fake surveys’ sa Maynila, tinawag na ‘desperate moves’

MANILA, Philippines — Mariing kinondena at tinawag ni Manila City Administrator Bernie Ang na ‘desperate moves’ ang naglalabasang pekeng survey sa lungsod na umano’y  insulto sa katalinuhan ng mga residente.

Tinukoy ni Ang ang ilang social media posts na nagsasaad na ang Pamantasan ng Lungsod ng Maynila (PLM) at mga empleyado ng Manila City Hall ay nagsagawa ng survey, kung saan lumitaw na napakalaki ng lamang ng isang kandidato, laban kay Manila Mayor Honey Lacuna.

Ang naturang mga pekeng survey, mariin namang pinabulaanan ng PLM gayundin ng mga empleyado ng city hall kung saan tiniyak ng PLM na nananatili ang kanilang non-partisan academic situation at ang prayoridad nila ay ang integridad, academic excellence at kapakanan ng mga miyembro ng kanilang komunidad.

“Purported surveys proliferating online involving alleged political preferences of PLM students are NOT sanctioned by the University and are NOT done by any duly-accredited student body or organization. PLM as a non-partisan educational institution does not authorize or allow any person or organization to conduct political or partisan surveys among members of its community,” ani Ang.

Siniguro rin ng city administrator na ang mga empleyado ng city hall ay hindi kailan masasangkot sa politika dahil mahigpit itong ipinagbabawal sa kanila.

“The disparity or difference shown on the fake surveys is so ridiculous that no one in his right mind will believe them.  This is a clear sign of desperation on the part of our political foes and we take this to mean that they have accepted defeat this early,” giit naman ni Ang.