Buking sa pekeng dokumento 2 Chinese na dinakip sa NAIA
MANILA, Philippines — Dalawang Chinese national ang naharang at inaresto ng mga tauhan ng Bureau of Immigration (BI) sa Ninoy Aquino International Airport (NAIA) Terminal 3 matapos mabuking na peke ang mga iprinisintang exit clearance noong Enero 24.
Sa report na tinanggap ni BI Commissioner Joel Anthony Viado, sina Wang Changru, 53 at Cui Wen, 33, ay pinigilan makasakay ng Cathay Pacific Airlines flight papuntang Hong Kong dahil sa pagpapakita ng mga pekeng dokumento.
Napag-alamang overstaying na sa bansa ang dalawa na dumating noon pang 2019.
Gayunman, nagprisinta sila ng immigration clearance certificates (ECC) ang dalawa na inisyu umano noong Enero 23, na nagsasabing awtorisado silang manatili sa bansa hanggang Pebrero.
Sinabi ni Viado na hindi inakala ng dalawang Chinese na made-detect ng kanilang centralized database ang mga pekeng dokumento.
Bunsod nito, agad na binitbit ang dalawa at itinurn-over sila sa legal division ng BI.
Mahaharap sa mga kasong deportasyon dahil sa paglabag sa Philippine Immigration Act of 1940 ang dalawang Chinese,
- Latest
