14K pulis ikakalat sa Traslacion
MANILA, Philippines — Inihayag ng National Capital Region Police Office (NCRPO) na nasa 14,000 pulis ang itatalaga para magbigay ng seguridad sa kapistahan ng Itim na Nazareno sa Quiapo, Maynila sa Huwebes, Enero 9.
Ayon kay NCRPO Director PBGen. Anthony Aberin, 12,168 pulis ang ikakalat at maglilibotsa paligid ng Quiapo habang ang karagdagang 2,306 security personnel ay mula sa iba’t ibang stakeholders upang matiyak na magiging maayos ang Traslacion na inaasahan nang dadagsain ng mga deboto. Ang paghahanda ng NCRPO sa Feast of the Black Nazarene ay kasunod ng matagumpay na paghahanda at maayos na implementasyon ng Ligtas Paskuhan ng Philippine National Police (PNP).
Sinabi ni Aberin na nasa 10,984 pulis ang ikinalat para sa peace and order mula Disyembre 16, 2024 hanggang Enero 1, 2025. Walang naitalang malaking krimen nitong Holiday Season.
Naniniwala si Aberin na malaking tulong ang police visibility at tulong ng mga barangay officials upang masiguro ang kaayusan sa kanilang mga nasasakupan.
Ani Aberin, hindi magbabago ang ruta ang Traslacion ng Itim na Nazareno na magsisimula sa Quirino Grandstand sa Luneta patungong Quiapo church.
Batay sa ruta, mula Quirino Granstand daraan sa Katigbak Drive, kanan sa Padre Burgos St. hanggang Finance Road, diretso ng Ayala Bridge, kaliwa ng Palanca St., kanan ng Quezon Boulevard, kanan ng Arlegui Street, kanan ng Fraternal Street, kanan ng Vergara Street, kaliwa ng Duque de Alba Street, kaliwa ng Castillejos Street, kaliwa ng Farnecio Street, kanan ng Arlegui Street, kaliwa ng Nepomuceno Street, kaliwa ng Concepcion Aguila Street, kanan ng Carcer Street, kanan ng Hidalgo hanggang Plaza del Carmen, kaliwa ng Bilibid Viejo hanggang Gonzalo Puyat, kaliwa ng J.P. de Guzman Street, kanan ng Hidalgo Street, kaliwa ng Quezon Boulevard, kanan ng Palanca St. hanggang ilalim ng Quezon Bridge, kanan ng Villalobos lalabas ng Plaza Miranda at ipapasok sa Quiapo Church.
Magsasagawa rin ng Fiesta Mass sa Quirino Grandstand sa hatinggabi ng Enero 8.
- Latest
