Empleyado, todas sa rider

MANILA, Philippines — Isang empleyado ang patay nang barilin ng isang motorcycle rider habang naglalakad sa Tondo, Manila kahapon.

Dead on the spot ang biktimang si alyas ‘Darius,’ ng Osorio Lacson St., sa Tondo dahil sa tama ng bala sa katawan, habang nakatakas at tinutugis na ng mga awtoridad ang di pa kilalang suspek na inilarawang nakasuot ng asul na jacket at itim na helmet.

Lumilitaw sa ulat ng Manila Police District (MPD)-Homicide Section na dakong alas-7:55 ng umaga nang maganap ang krimen sa Gerona St., kanto ng N. Zamora St., sa Tondo.

Batay sa kuha ng CCTV, makikitang naglalakad lamang sa lugar ang biktima nang bigla na lang barilin ng suspek, na lulan ng isang asul na Yamaha Mio motorcycle, at mabilis ding tumakas patungong Franco St., bitbit ang baril na ginamit sa krimen.

Nag-iimbestiga na ang mga awtoridad upang matukoy ang identidad ng suspek at ang motibo sa pagpatay.