QCRTC nag-isyu ng ‘go signal’ sa PNP sa pagsuri sa mga gamit ng Chinese spy

MANILA, Philippines — Pinayagan na ng Quezon City Regional Trial Court (QCRTC) ang  Philippine National Police-Anti-Cybercrime Group na eksaminin ang mga kagamitan ng  umano’y “spy” na nakumpiska sa naarestong Chinese noong nakaraang buwan sa Makati City.

Batay sa inilabas na  Warrant to Examine Computer Data ng QCRTC Branch 90, maaari nang  sumailalim sa digital forensic examination ang mga high-tech na gamit na nakumpiska sa isa umanong Chinese spy sa Makati noong nakaraang  buwan.

Ayon kay PNP-Criminal Investigation and Detection Group National Capital Region Chief Police Col. Joel Ana, nai-turn over na nila sa PNP Anti-Cybercrime Group ang mga gamit na subject ng warrant.

Kinakailangan kasi nila itong ipatupad agad-agad dahil 10 araw lamang ang binigay na palugit ng korte.

Kabilang sa mga pinasusuri ng CIDG sa ACG ang mga cellphone, antenna system, radio receiver/transmitter, router, aerial drone, pati na ang tablet at laptop ng Chinese.

Nabatid na naantala ang digital forensic examination sa naturang mga gamit dahil sa Warrant to Disclose Computer Data at hindi Warrant to Examine ang inilabas ng Makati RTC Branch 148 kaya kinailangan pa ng CIDG na mag-apply nito sa ibang korte.

Kasalukuyang nasa kustodiya pa rin ng CIDG sa loob ng Camp Crame ang Chinese na nahuli pero inaayos na rin ang paglilipat nito sa PNP Custodial Facility.