Paukyab na lay mahimo
Ang mosunod nga mga sayop ni kanhi Presidente Rodrigo Duterte maoy rason nga nabalhog siya ug wala nay kahigayonan nga makagawas sa prisohan sa The Hague:
Kumbinsido si Duterte nga bisan wala na sa puwesto siya gihapon ang tinuod nga lider sa Pilipinas kay kon ikumparar sa nibanos sa Malakanyang siya ang mas kamao, mas popular ug mas tuohan sa kasundalohan ug kapolisan; ug
Nagtuo si Duterte nga ang mayoriya sa katawhan lunod patay niyang mga dumadapig nga motuo bisan unsay iyang isulti ug motuman bisan unsay iyang isugo.
* * *
Dili na makabalik sa iyang moskitero sa Davao kay dili siya mas kamao (bisan sa panghambog nga siya ray presidente nga piskal), mas bagis lang siyang manghudlat. Dili siya mas popular (pagtibugsok sa ratings nakapasibog sa iyang kandidatura pagka senador). Wala na tuohi sa kasundalohan ug kapolisan (kay bisan siyay nagdoble sa ilang suweldo, dili na commander in chief).
Ug mayoriya sa katawhan (51% sa Pilipinas ug 62% sa Kabisay-an) gustong patubagon siya sa extrajudicial killings. Segun sa survey sa Social Weather Stations, 25% na lang ang lunod patay niya.
* * *
Sobrang bilib sa kaugalingon maoy rason nga labihan kamasaligon ni Duterte nga moulbo dayon ang people power aron mapalagpot si Presidente Ferdinand Marcos Jr. sa kada bunal, balikas ug insulto niya sa administrasyon.
Sukwahi nga kamatuoran maoy rason nga wala magtagad ang mayoriya sa iyang pagtawag sa presidente nga bangag, sa paghulga nga mobuwag ang Mindanao gikan sa republika ug pag-awhag sa kasundalohan ug kapolisan pagbakwi sa ilang suporta ngadto sa presidente.
* * *
Bisan hapit na magbuwan sa prisohan, padayong niinsistir si Duterte ug iyang mga anak nga siya gihapon ang tinuod nga lider ug nga ang mayoriya naghangad gihapon nila maong giapura ang Korte Suprema sa pagsugo sa Malakanyang ug ilang mga dumadapig pagprotesta sa pagpabalik ni Duterte sa Pilipinas. Bahala na kon nahibawo sila nga mga huwes sa International Criminal Court na ang magbuot.
Duna ba silay alas nga wala pa ikapagawas? Duna ba silay nahibaw-an nga wala nato mahibaw-i? Duna pa bay nahibiling maniobra? Wala na. Pero kinahanglang magpaukyab. Ug mopabuhi sa dugo sa ilang dinastiya. Kay unsa pa may lain nilang mahimo?
* * *
- Latest
