Mamuhatay og armas nasikop sa kapolisan sa Danao

CEBU, Philippines — Nadakpan sa kapolisan sa Danao City Police Station ang usa ka 63-anyos nga lalaki nga giingong mamuhatay og ilegal nga armas diha sa Purok Fatima, Sitio Portland, Barangay Cahumayan, Dakbayan sa Danao kagahapon sa kadlawon.

Ang suspetsado mao si alyas “Agapito”, nagpuyo sa naasoy nga dapit.

Matud ni Police Captain Dunn Blane Tabares, public information officer sa Cebu Police Provincial Office (CPPO) nga adunay nakahatag og impormasyon sa kapolisan sa Danao City Police Station nga ang suspetsado naghimo og ilegal nga mga armas.

Girespondehan dayon kini sa Danao City Police Station SWAT ug intelligence operatives ug pag-abot sa naasoy nga dapit gikataho nga naaktohan ang suspetsado nga gahimo og mga armas.

Nasakmit sa mga polis gikan sa suspetsado ang duha ka kalibre .45 nga pistol diin ang usa nahuman na og buhat samtang ang laing usa wala pa na-assemble.

Gawas niini, nasakmit usab sa kapolisan ang multiple lower receivers alang sa kalibre .45 nga pistola, firearm parts ug tools apil ang magazines, pattern pieces ug wrenches.

Wala gisalikway sa kapolisan ang posibilidad nga dugay nang tighimo og ilegal nga armas ang ang suspetsado ilabi na nga ang lugar diin kini nadakpan nahimutang sa bukirang dapit sa Dakbayan sa Danao.

Ang suspetsado pasakaan og kasong kalapasan sa Akta Republika 10591 kun “Comprehensive Firearms and Ammunition Regulation Act” ug Comelec Gun Ban.

Sayo pa,  ang Hepe sa Danao City Police Station Lieutenant Colonel Henrix Bancoleta gihatagan og usa ka buwan ni Police Brigadier General Redrico Maranan, direktor sa Police Regional Office-7 sa paghipos sa mga mamuhatay og ilegal nga armas sa siyudad.

Subay niini, si Police Colonel Jovito Atanacio, direktor sa Cebu Police Provincial Office (CPPO) nagkanayon nga kabahin kini sa ilang four flagship program nga mapugngan ang pagkatap sa loose firearms.

Gitutokan nila ang Dakbayan sa Danao tungod ka gikatahong anaa sa maong lugar ang production sa mga armas ilabi na ang loose firearms.

Sa laing bahin, pinasikad sa search warrant nadakpan sa mga operatiba sa Carbon Police Station sa Cebu City Police Office ang usa ka 24-anyos nga lalaki human kini gikatahong nakuhaan og armas diha sa Sitio Bato, Barangay Ermita, Dakbayan sa Sugbo niadtong Martes sa gabii.

Ang suspetsado mao si alyas “Laway”, kargador ug residente sa naasoy nga dapit. Base sa taho sa kapolisan nga ang suspetado giimbestigar tungod kay gialarma nga armado ug nagpabuto og armas niadtong Marso 5, 2025 diha sa Unit 3, Carbon Public Market, Barangay Ermita ingon man niadtong Marso 6, 2025  diha sa F. Gonzalez Street, Barangay Ermita, Marso 9, 2025 diha sa MC Briones Street, Barangay Ermita ug Marso 14, 2025 diha sa Sitio Bato sa maong barangay gihapon.

Si Regional Trial Court (RTC) Judge Anacleto Debalucos sa Branch 17 sa Dakbayan sa Sugbo ang niluwat og SW batok sa suspetsado niadtong Marso 24, 2025.

Nasakmit sa kapolisan gikan sa suspetsdo ang kalibre .38 nga revolver nga adunay upat ka buhing bala.

Sa iyang bahin, ang suspetsado nangangkon nga ang maong armas gibilin kini sa iyang amigo ug wala kini niya gigamit sa daotan. (BANAT NEWS)