Monisit: Ayaw paamota ang ginikanan sa graduation

CEBU, Philippines — Gipahinumdoman ang mga magtutudlo sa Dakbayan sa Talisay nga himuon ang graduation rites nga simple ug solemni. Si Dr. Arden Monisit, schools division superintendent nibutyag nga matag eskwelehan adunay Maintenance and Other Operating Expenses (MOOE) nga maoy igasto alang sa graduation. Busa dili angay nga mamugos ang mga magtutudlo ngadto sa mga ginakanan nga magpaamot pa gyud aron bonggahon ang kalihukan. Si Monisit nitataw nga kung mahimo mag uniporme lang aron wala nay abangan nga toga. Si Konsehal Eduardo “Digul” Gullas III, chairman sa committee on education niingon nga dili na kinahanglan pa nga mogasto ang mga ginikanan. Siya nipasabot nga angay man tuod saulogon ang kalampusan sa tinun-an pero di kini pasobraan nga makagasto pa og dako.

Matud pa ni Gullas nga kung mahimo ang uniporme lang ang sul-obon sa kalihukan.

Pero kung uyon ang ginikanan nga magtoga ilaha nasab kini ang pagbuot kay nindot man sab magtan-aw sa mga anak nga magtoga sa graduation. — /IBM (BANAT NEWS)