Aumentado nisugyot nga monorail ang ipahimutang sa Bohol

CEBU, Philippines — Girekomendar ni Bohol Governor Erico Aristotle Aumentado ngadto kang Department of Transportation Secretary Vince Dizon nga monorail ang ipahimutang sa Bohol imbes Bus Rail Transit.

Matud ni Aumentado nga atol sa nilabay’ng Regional Development Council meeting diin siya ang chairman natuki nila sa kanhi DOTr Secretary Jaime Bautista ang tinguha niini nga pagbutang og BRT project sa Bohol.

Ug atol sa pagbisita ni Dizon girekomendar niini nga mas maayo ang monorail lang ang ipahimutang sa Panglao-Tagbilaran-Dauise nga dapit imbes BRT.

Si Aumentado nipadayag ngadto sa bag-ong kalihim tungod sa nasinating dili maayo sa BRT sa Sugbo hinungda’ng nirekomendar kini sa monorail tungod kay grabe ang traffic sa Dakbayan sa Tagbilaran.

Gipadayag sa gobernador nga mahimo nga ang BRT himuon sa gawas sa Tagbilaran-Dauis-Panglao nga dapit kong tinguha ang pag-implementar niini.

Gipasabot ni Aumentado nga gamay lang ang area nga gikinahanglan sa monorail ug gili usab mohuot ang dagan sa trapiko.

Sa laing bahin, gilaoman ang pagdaghan sa mga turista sa Bohol kong mapun-an pa ang mga biyahe diha sa ilang airport.

Si Aumentado nagkanayon nga gipaabot sa buwan sa Hunyo o Hulyo karong tuiga ang Aboitiz Company na unya ang mo-take-over sa pag-operate sa Bohol-Panglao International Airport diin ilaha kining natuki atol sa pagbisita Dizon sa Bohol.

Si Aumentado nisugyot nga ang mga flight nga madugang nga mopadulong sa Bohol mao ang gikan sa Taiwan, Vietnam, Japan ug uban pa.

Nasayran nga sa pagkakaron adunay unom ka flights gikan sa Korea matag adlaw hinungdan nga daghang mga turista nga Korean national sa Bohol.

Si Mayor Jane Yap sa Tagbilaran City nibutyag nga sa buwan sa Hulyo ang Aboitiz Group maoy mo-operate sa Bohol-Panglao Airport. (BANAT NEWS)