Way nang-resign nga mga polis sa PRO-7

CEBU, Philippines — Dili tinuod ug walay polis nga sakop sa Police Regional Office(PRO)-7 ang nibiya sa serbisyo tungod sa pagdakop kang kanhi presidente Rodrigo Duterte ug pagtaral kaniya ngadto sa International Criminal Court sa Netherlands.

Sa official statement ni Police Brigadier General Redrico Maranan, Director sa PRO-7 nga gihimug-atan niini ang professionalism  ug dedikasyon sa ilang gipanumpaang trabaho ang kapolisan sa Central Visayas.

Matod sa opisyal pabiling fully committed sa ilang tahas ug dili apektado sa mga nahitabo sa politika ang kapolisan.

Sa records sa Regional Personnel and Records Management Division, nakita nga wala'y resignation letters gikan sa mga polis sila nga nadawat gikan sa nagkalain-laing police units ug stations sa PRO-7.

Susamang pamahayag sab ang gibutyag sa uban pang mga rehiyonal nga buhatan sa kapolisan sa nagkadaiyang lugar sa nasud. Ang Visayas Command bag-ohay lang sab nipagawas og pamahayag nga walay sundalo nga ni-resign sa trabaho tungod sa pagdakop kang Duterte.

Matud pa sa kampo, ang kasundalohan sa Armed Forces of the Philippines wala manumpa para sa us aka tawo kondili para sa Bandila, para sa Konstitusyon, para sa nasud ug para sa katawhan.  Sa imbestigasyon nga gihimo sa PNP Anti-Cybercrime Group mahitungod sa nikatap nga social media posts sa mga giingong nang-resign nga mga polis, nasuta nga dili kini tinuod  ug nasuta nga hinimo-himo lang kini og sibilyan nga social media user.

Kung nabantayan karon ang social media, daghang mga fake news nga nanggawas diin gigamit hasta ang relihiyosong kalihokan sa Pista Senyor ug gipagawas nga kalihokan kadto sa mga supporters ni Duterte nga nagprotesta tungod sa pagdakop kaniya .

“Our absolute loyalty is to the Constitution, the Flag, the country, and the people," matud ni Maranan.  Subli niyang gipahinumdoman ang mga sakop nga magpabiling magmabinantayon ug serbisyohan ang komunidad nga dunay integridad ug propesyonalismo. (BANAT NEWS)