Thunder swak sa NBA playoffs
BOSTON — Bumira si Shai Gilgeous-Alexander ng 34 points sa 118-112 pagsapaw ng Oklahoma City Thunder sa nagdedepensang Celtics at angkinin ang playoff berth.
Humakot si Chet Holmgren ng 23 points at 15 rebounds para sa Western Conference-leading Oklahoma City (54-12).
Kumamada si Jayson Tatum ng 33 points para sa Boston (47-19) habang may 22 markers si Derrick White at humakot si Al Horford ng 18 points at 10 rebounds.
Nagtabla sa 98-98, isang 8-0 atake ang ginawa ng Thunder tampok ang three-point shot ni Kenrich Williams at dalawang free throws ni Gilgeous-Alexander para makawala sa Celtics.
Sa Atlanta, ipinasok ni Trae Young ang lahat ng kanyang 21 free throws at tumapos na may 35 points sa 123-110 pagdagit ng Hawks (32-34) sa Charlotte Hornets (16-49).
Sa Houston, bumanat si Fil-Am guard Jalen Green ng 29 points para banderahan ang Rockets (41-25) sa 111-104 pagpapalubog sa Phoenix Suns (30-26).
Sa Denver, naglista si Anthony Edwards ng 29 points at may 25 markers si Julius Randle sa 115-95 pagkagat ng Minnesota Timberwolves (38-29) sa Nuggets (42-24).
- Latest
