Mga karateka sa AUK-Cebu misidlak sa National Championships
CEBU, Philippines — Usa ka pundok sa mga Sugbuanong karateka gikan sa Association for the Upliftment of Karatedo (AUK) ang misidlak uban ang tulo ka gold, duha ka silver ug duha ka bronze medals sa 6th Karate Pilipinas National Championships didto sa Tagaytay Combat Sports Center sa Tagaytay City ning bag-ohay pa lamang.
Si Alexis Nicole Villacarlos maoy nangu sa dalaygong salida sa AUK-Cebu sa tulo ka adlaw nga torneyo human siya milangkat og gold medal sa juniors kumite female -66kg category ug silver sa kata competition.
Nakamina sab og bulawang medalya si George Emannuel Manos sa kumite male +76kg division, samtang si Maria Athena Paloma naka-gold sa girls kata 8-9 age group.
Sa laing bahin, si Diego de Pio misakmit og silver medal sa boys open kumite, samtang sila si Miah Placide Batayola ug Zane Patrick Gonzalez parehong milabni og bronze sa kata event alang sa mga atleta nga nag-edad og siyete anyos paubos.
Ang AUK-Cebu ubos sa paggiya nilang Sensei Rhodee Antoinette Saavedra, Micah Borromeo, Sam de Ariel Zozobrado ug Richie Villacarlos.
- Latest
