Nag-wild si Shai, mipabuto'g career-high 54 puntos
CEBU, Philippines — Si Shai Gilgeous-Alexander mipaulbo og career-high 54 puntos aron pangulohan ang Oklahoma City Thunder ngadto sa 123-114 nga pagbugha sa Utah Jazz sa NBA kagahapong adlawa didto sa Paycom Center sa OKC.
Mao kini ang labing unang higayon sa karera ni Gilgeous-Alexander diin siya mibomba og dili mominus 50 puntos sa usa ka duwa.
Iya kining gipalamanan og walo ka rebounds, lima ka assists, tulo ka steals ug duha ka blocks alang sa Thunder, nga padayong nag-una sa liderato sa Western Conference uban ang 36-7 rekord.
Dako sab og naambag si Jalen Williams nga mihipos og 25 puntos ingon man si Cason Wallace nga miamot og 13 puntos.
Didto sa Houston, gipakuratan sa Rockets ang Cleveland Cavaliers, 109-108, sa kulbahinam kaayo nilang engkwentro.
Sa susamang makapaisa'g balahibo nga resulta, ang Minnesota Timberwolves nakaipsot sa Dallas Mavericks, 115-114.
Sa ubang mga duwa, ang Memphis Grizzlies miposte sa ikaupat nilang sagunson nga daog human gipahagba ang Charlotte Hornets, 132-120, samtang ang Phoenix Suns milampornas sa Brooklyn Nets, 108-84.
- Latest
