Nagpabuto sa Goodbye Philippines masaligong wala siyay sala sa hitabo

CEBU, Philippines — Andam nga moatubang sa kaso ang 27 anyos nga lalaki kinsa maoy gipasanginlang maoy nigamit sa ginadiling pabuto nga “Goodbye Philippines” nga giingong mao sab nga matang sa pabuto nga nakapatay sa 10-anyos nga bata ug miangol sa laing upat atol sa pagsugat sa Bag-ong Tuig  sa Barangay Bulacao, Syudad sa Talisay.

Ang maong lalaki maoy matud pa nakit-an nga nagpabuto sa maong pabuto makaduha ka higayon. Apan ang ikatulo niya nga gidagkotan nikagar  maong nilakaw kini.

Apan gikataho nga gipunit kini sa grupo sa menor de edad ug gidala sa ilahang dapit diha sa Purok Camunggay, Barangay Candulawan.

Ug didto gihuho ang pulbora ug gipadad-ogan sa buak nga tiles ug mga bato. Usa sa mga bata ang nidakdak og bato hinungdan nga niulbo kini nga miresulta sa pagkamatay ni Jermie Cagang, 10 anyos ug niangol sa nag edad og 17 anyos, 16, 10 ug 8 anyos.

Namatay diha-diha dayon si Cagang samtang padayon pa nga nagpaalim ang uban niya nga higala sa tambalanan.

Ang 27 anyos nga lalaki mitahan sa iyang kaugalingon sa kapolisan aron malimpyo ang iyang pangalan.

Apan ang kapolisan gikatakdang mopasaka kaniya og kasong reckless imprudence resulting to homicide and multiple physical injuries.

Si Mayor Gerald Anthony “Samsam” Gullas nasubo sa panghitabo ug nimando sa City Social Welfare and Development (CSWD) nga susihon ang kahimtang sa mga biktima aron matagaan og unsa man nga ayuda ang ilang gikinahanglan.—  IBM BANAT NEWS