Edsa gidagsa sa mga pro-Sara

Nalingaw kong nagtan-aw sa YouTube nga nakakita sa bagang pundok sa katawhan habig sa magkaatbang nga karsada sa Edsa, kinsa samtang nagwarawara sa ilang mga kamot, nagdungan sab pagsinggit og: “Inday Sara Duterte!” sa miaging Disyembre 30, 2024 atol sa Rizal's Day.

Non-stop ug long-play ra ba. Haskang nindota paminawon sa giisip kong huni sa mga dalunggan. Pun-an, nga may nagbahas babaye nga nagdalag megaphone ug daw kahilakon apan tin-aw misiyagit pod og: “Sara Duterte!,” ay pastilan, ang maong huni nahimo na hinuong kahapdos nga misamad sa akong dughan.

Nganong nasamad? Kay imong ma-feel nga ang maong mga singgit, lunlon tiunay-matinud-anon nga sentimentong nagagikan sa nagisi na nilang kasingkasing, diin sukad pa sa paglingkod pagka-presidente ni Bongbong Marcos Jr. (PBBM) niadtong 2022 hangtod karon, nagsige na pangitag paagi nga mahanaw o ma-impeach si Bise-Presidente Sara ‘Inday’ Z. Duterte, ang nahabiling alas sa mga kabus, ang kinalig-onang Tingog sa Katawhan, kinsa sa tanang taas opisyal sa kagamhanan, mao na lamay  bugtong nakig-away sa mga kahiwian ug kabulastugang gawi sa administrasiyong Marcos.

Hasta AFP-PNP generals nga gipang-appoint ni PBBM nadani sab sa pagpaulipon sa mga tinagingting sa salapi, nga maoy nakapagubag samot sa nasudnong siguridad, sanglit ang ilang pagpangalagad dili na man neutral. Kondili, atua na pokus sa pamilyang Marcos, bahalag ang pamaagi niini maka-bankrupt sa Pilipinas.

Gani, may mga retired AFP-PNP generals nga nangutana sa mga aktibo, kon angayan pa ba silang tawgon og polis ug sundalo? Maong hisabtan gyod nako ang gibati sa katawhang nagsinggit sa Edsa og Inday Sara Duterte. Kay sila sama ni Inday, mga biktima usab sa grabing pagkabakakon ni PBBM ug sa iyang mga alipores.

Hinungdan, nga dili lang Sara Duterte ilang gisangpit-singgit. Kondili, gipalanog pa gayod ang ilang kinakusogang siyagit: “Marcos resign! Marcos Resign! Marcos…” Timaan nga giluod na gyod sila sa kasamtangang administrasiyon.

Alegre. Kay dihay sakyanan sa media nga mihunong sa tungod sa mga nanagsiyagit ug mao na hinuoy gisinggitan og: “Bias! Bias! Bias!... Media bias, Media…” Wala magdugay napugos ang maong media sa pagpalayo.

Mao kini ang nahitabo sa Edsa sa miaging Bonifacio Day. Sa mga pro-good governance makalipay. Apan sa mga anti ginasaway!