NU nakatutok sa back-to-back
MANILA, Philippines — Nakasentro ang atensiyon ng National University na sakmalin ang back-to-back championships sa UAAP Season 87 women’s volleyball tournament na papalo sa susunod na taon.
Nais ni reigning MVP Bella Belen na mag-iwan ng magandang alaala sa Lady Bulldogs kung saan pakay nitong makumpleto ang back-to-back na matagal na nitong inaasam para sa NU.
Matapos magkampeon noong Season 84 ay hindi naisakatuparan ng Lady Bulldogs ang tangkang back-to-back noong Season 85 matapos matalo sa De La Salle University Lady Spikers sa finals.
Nabawi naman ng NU ang korona noong Season 86 nang talunin nito sa championship series ang University of Santo Tomas.
Kaya naman sa pagkakataong ito ay target ng Lady Bulldogs na masiguro ang back-to-back lalo pa’t intact pa rin ang kanilang tropa.
“Hindi kasi namin nagawa ‘yung back-to-back noong Season 85 kasi nga natalo kami sa La Salle. So this time, sana magawa namin,” ani Belen.
Maganda ang pre-season ng NU kung saan napasakamay nito ang korona sa Shakey’s Super League Collegiate Pre-Season Conference.
- Latest
