Litaniya sa mga sayop
Sayop ang desisyon sa House Committee on Good Goverment pagbalhin ni Atty. Zuleika Lopez gikan sa detention facility sa House of Representatives ngadto sa Correctional Insitution for Women (CIW) sa Mandaluyong dayong tungang gabii niadtong Biyernes, Nobyembre 22.
Nga nanukad sa pagpamugos ni Bise Presidente Sara Duterte pagpabilin sa Batasang Pambansa Complex sa ikaduhang sunudsunod nga gabii sukwahi sa mga lagda sa House. Bisan unsa pa sila kasuod, ang atraso ni Duterte dili iya ni Lopez. Dili makiangayon nga si Lopez ang gipahimungtan sa ilang kainutil sa pagbadlong ni Duterte.
* * *
Nalikayan unta ang kaguliyang kon mas sayo pang giluwatan ang transfer order. Pero wala maanad ang mga kongresista sa pagtrabaho lapas sa tulo ra ka adlaw nilang session days kada semana. Maong gabii nang nakahunahuna pagbaraw sa paugat ni Duterte pinaagi sa pagbalhin ni Lopez.
Bisan sa katapolan ug ka-bangkarota sa mas maayong ideya sa mga kongresista, dunay gahom ang ilang komitiba pagbalhin ni Lopez. Ang kaapiki sa oras sa pagpatuman nanukad sa paugat ni Duterte pagpahimutang sa mas dakong risgo sa iyang seguridad ug sa kaligdong sa institusyon.
* * *
Tungod sa pagpaluag sa mga lagda ug ka inutil sa mga guwardiya sa House, nadasig si Duterte sa pagpatuyang sa iyang pangabuso:
• Gibabagan niyang pagbalhin ni Lopez ngadto sa CIW;
• Namawong sa suga samtang nag-Zoom press conference sa detention room ni Lopez aron pagpatuo nga gihasi sila ug nahulga ang ilang seguridad; ug
• Nigamit siya og puwersa sa pagbalhin ni Lopez gikan sa Veterans Memorial Medical Center ngadto sa St. Luke’s Medical Center.
* * *
Ambot idayon ba sa administrasyon ni Presidente Ferdinand Marcos Jr. ang pagpasaka og tukmang mga kaso batok sa nagkadaghan nga mga atraso ni Duterte. Sama sa naandan, mas sayon nga madutlan sa balaod ang mga opisyal sa Vice Presidential Security and Protection Group (VPSPG) nga nisipsip niya.
Apil sa ikiha mao ang hepe sa VPSPG nga si Koronel Raymund Dante Lachica. Kinsa ipatawag sa House aron mopasabot nganong siyay gihatagan sa tanang P612.5 milyones nga confidential funds sa mga upisina ni Duterte sa 2022 ug 2023. Mas una hinuon nga patubagon sa iyang pagtukmod sa doktor sa Philippine National Police (PNP).
* * *
- Latest
