Force multipliers outpost gipahiluna saTalisay

CEBU, Philippines — Aron pagtabang sa kapolisan sa pagpugong sa mga krimen nga motumaw ilabi na sa mga dapit nga hugpaan sa daghang tawo, ang kapolisan sa Talisay City Police Office nipahimutang og force multipliers outpost.

Matud pa sa hepe sa kapolisan Police Lt. Col. Epream Paguyod nga tinguha nila nga mabutangan gayud ang halos tanang barangay sa siyudad apan sa pagka karon usa pa ang ilang napahimutang ug posibleng dugangan kini og laing usa sa dili pa matapos karong tuiga.

Anaa sa sitio Kimba, Barangay San Roque ang unang gipahimutang nga force multipliers outpost.

Sumala pa ni Paguyod, ang maong lugar giingong adunay pipila ka mga kawat nga nahitabo ug uban pang krimen.

Adunay 24 oras nga magbantay sa maong outpost aron dili kini mahimong tambayanan lang sa mga badlongon ug matag karon ug unya tuyokon kini sa kapolisan.

Samtang nagpadayon usab karon ang kapolisan sa paggamit sa motorcycle wiper patrol sa dakbayan sa Talisay, diin mao kini ang usa sa best practices sa Talisay City Police.

Ang maong motorcycle wiper patrol mosulod kini ngadto sa mga hilit nga dapit ug dali usab kini nga makaresponde, pinaagi sa alarm system nga gigamit.  MEL BANAT NEWS