Pakistanis na buy-bust

Duha ka mga Pakistanis ang nadakpan sa buy bust operation sa Philippine Drug Enforcement Agency-7 kagahapon sa buntag sulod sa usa ka hotel diha sa dalan Colon human ang duha mibaligya og mga illegal nga drogas nga gibana-banang P1 milyon ang kantidad, lakip na niini ang gitawag nga ‘liquid shabu’ kun Ketamine Hydrochloride.

Ang nangadakpan giilang sila si Chaudry Khuram Aziz, 33, ug Majid Khan,30, pulos mga Pakistanis apan nakabaton na og permanent residency dinhi sa nasud ug nagbase na sa Pasay City.

Kagahapon sa buntag gipresentar ni Atty. Jennifer Rosales ang regional officer in charge sa PDEA-7 ang duha lakip na ang kinarton nga mga nagkalain-laing mga medisinang gilatid  sa Dangerous Drugs Act of 2002 nga delikado sa panglawas sa tawo kung gamiton sa dili husto.

Si Rosales   mitug-an sa mga tigbalita nga ang transaksyon nagkantidad og P350,000 apan ang nakumpiskar nga mga drugas gibana-banang mohalin sa street market og P1 milyon.

Ang PDEA gikatahong naniid na sa kalihukan sa duha sulod sa tulo na ka bulan ug niadtong Huwebes natigayon ang transaksyon nga modeliber og drugas ang duha ug anha mag-abot sa usa ka hotel sa Lahug.

Apan gikatahong ang duha mipahibalo sa poseur buyer nga dili nila mahatud ang drugas nianang adlawa hangtud nga nagkasabot nga kagahapon sa buntag nalang nila ihinayon ang transaksyon diha sa usa ka hotel sa dalan Colon.

Diha sa maong hotel nahitabo ang binayranay ug diha-diha gisikop ang duha human modawat sa marked money nga gibayad. Hinuon wala mosukol ang duha ka langyaw.

Nakuha gikan kanila ang 90 ka vials nga Ketamine Hydrochloride; tulo ka box nga Nitrazepam; 546 ka tabletas nga Cytotic; 540 ka tabletas nga Lorazepam(Ativan) ug 22 ka kahon nga Vigra.

Ang Ketamine Hydrochloride gikatahong mao karon ang gigamit sa mga addict sa Manila ug gibansagan kining ‘liquid shabu.’

Sumala pa sa PDEA, ang duha adto  mangompra sa Pakistan diin dili kaayo higpit ang pagbaligya niini didto kumparar dinhi nga kinahanglang dunay reseta, apan dinhi nila kini dad-on sa nasud ug ibaligya sa mga Pilipinong kontak.

Ang duha nga makamao nang manulti og Tagalog   parehong mihimakak sa pasangil nga sila mga drug pushers.