PWS nituman sa mga environmental laws

CEBU, Philippines — Kompanya nga nagdumala sa landfill sa Barangay Binaliw miklaro nga nituman sila sa tanang mga balaod sa pag-operate og susama niini nga pasilidad ug naa sa ilang hunahuna ang kaluwasan sa mga molupyo sa lokal nga komunidad. Mao kini ang pagklaro sa Prime Integrated Waste Solutions Inc. (PWS) sukwahi sa gihulagway nila nga ‘misleading’ ug ‘malicious’ nga pamahayag sa kanhi ARN Central Waste Management Inc. (ACI) nga maoy nagdumala sa maong landfill sa dakbayan sa Sugbu. Ang PWS maoy nakapalit sa maong pasilidad niadtong 2022 ug sukad kaniadto padayon ang pagpalambo niini aron mamahimong modern resource recovery facility.

Gikwestyon sa PWS ang pangangkon sa kanhi ACI shareholders pinangulohan ni Arnold Espinoza bahin sa operasyon nila sa maong landfill nga unta ang naulahi  man maoy nagdumala niini sud sa tulo ka tuig.

Matud sa PWS sa operasyon sa ARN daghang mga reklamo nadawat may kalabotan sa pagsunod sa mga environmental laws.

Midugang ang PWS nga sukad sa ilang pagdumala sa maong landfill niadtong 2022 nakapatuman na sila og mga upgrades nga ang tumong aron mamenusan pa gyud og 20 porsiyento ang basura nga malabay.

Sumala pa sa PWS nigamit sila og state-of-the-art equipment gikan sa Uropa ug Asya sama sa vibrating sieves, baler systems, magnetic separators, ug ingon man air density separator aron mas daghan pa silang mabahig nga recyclable materials gikan sa basura.

Makompleto sab karong bulana ang bag-o nilang Wastewater Treatment Facility nga dunay kapabilidad nga ilang ipanghagad nga serbisyo sa mga parokyanong nagkinahanglan niini.

Gawas pa niana, kompleto sa proteksyon ang ilang mga kawani, naa kanunay sa ilang hunahuna ang proteksyon sa kalikopan ug nakahatag sab sila og trabaho sa lokal nga komunidad. Aktibo sab silang nakigalayon sa DENR ug EMB sa padayon nilang pagpalambo sa site agi og pagsunod sa tanang nalatid sa balaod.

Giklaro sab sa PWS nga aduna silay Pollution Control Officer (PCO) nga accredited sa Environmental Management Bureau Region 7 (EMB-7) ug andam silang moluwat og kopya sa certificate sa ilang PCO nga balido hangtud Hulyo 2026.

Nakaduso na sab ang ilang PCO og compliance monitoring report para sa bulan sa Hulyo hangtud Disyembre 2023, sukwahi sa alegasyon nga wala sila nituman niini.

Sa transfer of ownership,  giklaro sa PWS nga ubos sa EMB Memorandum Circular No. 2021-05, magkinahanglan kini og letter of request gikan sa orihinal nga nagkupot sa Environmental Compliance Certificate (ECC) nga mao ang ACI.

Nangangkon ang PWS nga kompleto sila sa rekisito apan ang nalangay lang kay wala pa gihapon mohatag og letter of request ang mga kanhi shareholders sa ACI.

Gipahibalo sa PWS nga gitun-an nila karon ang posibleng legal nga mga lakang batok sa kanhi opisyales sa ACI.—IBM BANAT NEWS