Cebu City nakignegosasyon sa ilang paggamit sa property sa MCWD

CEBU, Philippines — Si Acting Cebu City Mayor Raymond Alvin Garcia nipadayag nga nakignegosasyon sila karon sa tagdumala sa Metropolitan Cebu Water District (MCWD) aron lugwayan ang paggamit sa kagamhanan sa siyudad sa ilang gipanag-iya nga property nga gigamit isip satellite office.

Ang American-period building tupad sa MCWD main building nga gigamit sa Cebu City isip satellite office bag-o lang gi-flag down sa Commission on Audit (COA) tungod sa P5 milyones nga repair ug renovation nga gihimo sa kagamhanan sa siyudad sa building bisan og wala pay kasabutan o contract of lease sa MCWD.

Atol sa press conference niadtong Huwebes, Hulyo 25, 2024 si Garcia nagkanayon nga aduna na siya’y unang mga diskusyon tali sa MCWD ug nakadawat og positibong tubag tungod kay wala pa sila’y nakit-an nga lugar nga kabalhinan sa mga buhatan sa City Hall nga anaa karon sa building.

Ang satellite office giukopar karon sa mga buhatan sa  city hall sama sa Task Force Gubat sa Baha, City Environment and Natural Resources Office, Bantay Dagat Commission, Division of the Welfare of the Urban Poor, City Hospitalization Assistance Management Program, ug uban pa.

Sa samang report sa COA girekomendar niini nga makig-diyalogo ang siyudad sa MCWD ug husayon ang mga binuwan nga bayronon sa abang.

Namatikdan sa mga state auditor nga human sa renovation niadtong tuig 2023 gi-ukopar dayon sa pipila ka opisina sa siyudad ang edipisyo.

Hinuon ilang nahibaw-an sa laing pakisusi diha sa buhatan sa city administrator nga ang lease of contract wala pa pormal nga nasugdan hangtud sa kataposan sa tuig 2023 tungod sa wala pagsinabtanay sa mga partido sa binuwan nga presyo sa abang.

Subay niini, ang Dakbayan sa Sugbo adunay proposal nga P200,000 matag buwan samtang ang tag-iya sa property nga MCWD gusto nga P700,000 matag buwan.

Gitumbok sa COA nga sa Annex H (Item 9) sa 2016 Revised IRR sa RA No. 9184, ang mga ahensiya sa gobiyerno mahimong mag-abang og real property o venue nga gipanag-iya sa publiko gikan sa ubang ahensiya sa gobiyerno apan pinaagi sa contract of lease.

Niadtong Pebrero 22, 2023, gikataho nga ang Cebu City Legal Office (CLO) nitubag sa ultimatum sa MCWD nga bakantehan ang ilang satellite office nga nag-ingon nga ang kagamhanan sa siyudad anaa sa “lawful possession of the property” isip basehanan ug uban pa. BDB BANAT NEWS