UV Lancers mag-tour sa Hong Kong

CEBU, Philippines - Ang University of the Visayas Green Lancers nagpanikad na alang sa lima ka adlaw nilang tour sa Hong Kong karong Pebrero 15-19.

Sigun sa gisaad ni UV Basketball team manager Gerald Anthony 'Samsam' Gullas Jr., ang pagbiyahe sa Lancers sa maong langyaw nga dapit tipik sa ilang insentibo gumikan sa ilang pagdaog sa kampiyonato sa Cebu Schools Athletic Foundation, Inc. (CESAFI) men's basketball sa miaging tuig.

Ubos sa pagtimon ni coach Gary Cortes, ang Lancers mipalayas sa University of San Carlos (USC) Warriors sa ilang trono aron pagbisbis sa duha ka tuig nilang huwaw sa korona sa CESAFI.

Usa ka adlaw human sa pag-abot, si UV Lancers assistant coach Van Halen Parmis nagkanayon nga mopahigayon sila og tour ug autograph signing sa usa sa mga malls didto sa Tsim Sha Tsui district.

Sa petsa 17 ug sunod nga adlaw, si Parmis mibutyag nga moduwa sila og tune-up games batok sa mga piniling teams nga toa magbase sa HK.

Sa katapusang higayon nga sila nakampiyon sa CESAFI niadtong tuig 2013, ang UV Lancers, nga kanhi gidala ni coach Felix Belano Jr., maoy mirepresentar sa Pilipinas sa 27th Summer Universiade didto sa Kazan, Russia. (EBV)(BANAT NEWS)