Bag-ong MOA tali sa Talisay ug MCWD gi-andam
CEBU, Philippines - Nihatag na og pagtugot ang konseho sa dakbayan sa Talisay ngadto ni Mayor Eduardo Gullas aron sugdan na sa paghan-ay ang mga probisyon sa Memorandum of Agreement (MOA) tali sa Metro Cebu Water District (MCWD).
Si Bise Mayor Alan Bucao nibutyag nga ang pagtugot sa konseho gipaagi sa pagpasar og resolusyon nga gipangamahanan ni Konsehal Richard Francis Aznar kagahapon. Asoy pa niya nga iya na sa mayor ug sa city legal officer ang paghan-ay unya sa mga probisyon sa MOA.
Sa nasayran, ang dakbayan sa Talisay gusto nga mas dako ang bayad sa MCWD sa gikuha nga tubig sa dakbayan. Gawas pa niana, gusto sab sa siyudad nga aduna gyu’y representanti ang kagamhanan sa MCWD Board of Directors.
Gibag-o nila ang maong MOA tungod usab sa kadugay na niini kun diin nagsugod kini niadto pang Agosto 1994 sa dihang munisipyo pa ang Talisay.
Matud pa ni Konsehal Aznar nga si Mayor Gullas ug si Atty. Sususco ang legal officer sa siyudad mao na unya ang makigsabot sa MCWD sa pagahimuon nilang probisyon.
Nasayran nga ang taga MCWD nipahibawo na nga andam sila’ng maminaw kun unsa ang gusto sa kagamhanan sa Siyudad sa Talisay. (BANAT NEWS)
- Latest
