Gubat sa propaganda

Napilde ang administrasyon ni Presidente Ferdinand Marcos Jr. sa gubat sa propaganda human sa pagkapriso ni kanhi presidente Rodrigo Duterte sa The Hague. Mao ni hinungdan nga nisulbong ang mga kandidato pagka senador ni Duterte nga gipangulohan sa reelectionists nga silang Bong Go ug Bato dela Rosa.

Napilde ang administrasyon dili lang tungod sa organisadong troll army nga gipalihok sa kaliboan ka pekeng accounts sa social media kon dili tungod sab sa kalibog sa Malacañang unsaon pagpanalipod ang pagdakop ni Duterte ug pagtugyan niya ngadto sa International Criminal Court (ICC).

Bisan sa tanan niyang makinarya sa pagbombardiyo sa publiko sa opisyal nga linya sa kamakiangayon sa pagdakop ni Duterte (dunay arrest warrant gikan sa ICC ug gibasahan sa iyang Miranda rights) ug sa legalidad sa pagdala niya sa The Hague (pinasubay sa International Humanitarian Law), nangiyugpos ang administrasyon.

Kay masaligon nga bisan unsaon sa iyang mga dumadapig sa pag-petisyon sa Korte Suprema, pagprotesta sa kadalanan ug pagpabaha og bakak sa social media dili na makagawas si Duterte sa prisohan hangtod nga masilotan sa kasong crimes against humanity batok niya.

Wala katabang sa administrasyon ang taphaw nga panagang sa lapad nga pagpangatake sa mga Duterte:

• Wala sila motabang sa ICC, kay wala mausab ang baruganan ni Marcos Jr. nga dili na sakop ang Pilipinas ug wala nay obligasyon sa pagtabang, kon dili

• Igo lang nisunod sa pamalihug sa International Criminal Police Organization (Interpol), nga dili angayng balibaran kay makatabang sa pagpanalipod sa 10 milyones ka mga Pilipino nga nanrabaho ug nagpuyo sa nagkalainlaing kanasuran.

Natabonan ang linya sa administrasyon sa mas gamhanan ug emosyonal nga mga bakak sa pagdagit sa masakiton nga si Duterte, pagyatak sa tawhanong katungod sa 80 anyos nga himatyon na, paglawog niya ngadto sa mga langyaw ug posibleng pagkamatay sa selda nga layo sa iyang yutang natawhan.

Hinaot nga masihag sa mosunod nga mga adlaw ang naandang pangilad sa mga Duterte. Ug, sama sa kamingaw na sa mga protesta pagpabalik niya sa Davao, isalikway sa mga botante ang iyang mga alyado nga nidupa sa bangis nga pag-ihaw sa kapin sa 30,000 ka mga biktima sa peke niyang drug war.