CEC Dragons gikoronahan nga back-to-back champions
Padayong naghari sa U12 division sa CESAFI basketball
CEBU, Philippines — Gi-sweep sa Cebu Eastern College (CEC) Dragons ang Sacred Heart School-Ateneo de Cebu (SHS-AdC) Magis Eagles sa ilang best-of-three finals uban ang 66-41 nga demolisyon sa Game 2 aron pagpabiling kampiyon sa Under 12 division sa Cebu Schools Athletic Foundation, Inc. (CESAFI) Season 24 basketball tournament niadtong Dominggo, Disiembre 1, didto sa Cebu Coliseum.
Si David Hope Gabisan misidlak nga labing hayag alang sa Dragons bitbit ang 24 puntos, lima ka rebounds, tulo ka steals ug usa ka block hinungdan sa pagbayaw kaniyang Finals Most Valuable Player.
Nahimong triple ang selebrasyon ni Gabisan gumikan kay naglangkob sab siya sa Mythical 5 kauban ang teammate niyang si Alexander Gabriel Panon, Dwayne James Paceno sa Magis Eagles, Daniel Xian Chiong sa Cebu Institute of Technology-University (CIT-U) Baby Wildcats ug Vincent Geonzon sa University of San Carlos (USC) Baby Warriors. Bugnaw kaayo ang sinugdanan sa Dragons hinungdan nga nabiyaan sila og nuybe puntos, 7-16, sa sayong bahin sa duwa apan milusad og esplosibong resbak aron pagposte og 34-24 nga bentaha sa halftime.
Sukad niadto, namintinar sa Dragons ang double-digit nilang labaw nga ila pang gipaburot ngadto sa 57-34 sa pinal nga kuwarto minutos sa wala pa milahos ngadto sa 25 puntos nga pagpasukarap sa Magis Eagles.
"First of all, I thank the Lord above for giving us this championship and to the CEC community especially the parents and teachers who supported the players. Thank you, we are now back-to-back champions!" padayag pa ni coach Rodmark del Rosario nga maoy katambayayong ni coach Mark Tallo pagpadagan sa programa sa basketball sa CEC.
Ang ubang mga sakop sa CEC Dragons U12 team mao sila si Wil Tyler Navasca, Persues Rafael Baguio, Zane Gray Dela Cruz, Samuel Norben Malagar, Kharl James Tupag, Vinz Rowell Juban, Mark Niño Yu, Rhisiart Theon Jayme, Jarold Phil John Lanzar, Dojann Lee Besabella, Jhobem Badajos, Ralph Dylan Bolanio ug Jheric Frederic Apor.
Sa laing bahin, sa Under 15 finals, ang University of the Visayas (UV) Baby Lancers naka-angkon og laing kinabuhi human gibaslan ang CEC Dragons, 57-49, sa Game 2. Ang tinagakay nga duwa sa ilang best-of-three title series gikatakda sa alas-5 sa hapon karong Miyerkules, Disiembre 4.
- Latest
