Lady Falcons may misyon sa Lady Blazers
MANILA, Philippines — Sisikapin ng Adamson University na makuha ang panalo kontra College of Saint Benilde upang masilo ang huling slot para sa Pool D playoffs berth ng 2024 Shakey’s Super League Collegiate Pre-season Championship na lalaruin sa Rizal Memorial Coliseum ngayong araw.
Ngayong alas-6 ng gabi ang bakbakan ng Lady Falcons at Lady Blazers, pakay ng una na samahan ang pool leader Far Eastern University na umusad sa susunod na round sa tournament na suportado ng Shakey’s Pizza Parlor, GCash, Chery Tiggo, F2 Logistics, Peri-Peri Charcoal Chicken, Potato Corner, R and B Milk Tea at Summit Water.
Walang dungis ang karta ng Lady Tamaraws sa tatlong laro kaya panigurado na sila sa playoffs, may 1-1 card naman ang Lady Falcons habang 0-1 record ang Lady Blazers at 0-2 ang sa San Sebastian College Recoletos.
Nadapa ang Adamson sa huli nilang laro laban sa Lady Tamaraws 25-16, 22-25, 33-31, 20-25, 13-15.
Lumuhod naman ang three-time NCAA champion, Saint Benilde sa unbeaten FEU (3-0), 17-25, 25-21, 16-25, 19-25, noong Oktubre 6.
Samantala, makakalaban ng Ateneo ang laglag na rin na Emilio Aguinaldo College sa alas-3:30 ng hapon sa Pool A habang magkakaldagan ang mga sibak ng Lyceum of the Philippines University at University of Perpetual Help System Dalta sa ala-1 ng hapon.
- Latest
