Rubin misidlak dayon sa unang Internasyonal nga kompetisyon

CEBU, Philippines — Ang Sugbuanong chess player nga si Apple Rubin mikuha dayon og atensiyon sa labing una niyang torneyo gawas sa nasud.   

Inutok nga miduwa ug masaligon, ang garbo sa dakbayan sa Toledo milangkat og gold medal sa girls 14 Under blitz category sa 22nd ASEAN+ Age-Group Chess Championships nga gipahigayon niadtong Agosto 22-30 didto sa Vientiane, Laos. Si Rubin mi-iskor og impresibong 8.5 puntos sud sa siyam ka hugha nga iyang gituldokan pinaagi sa dominanteng kadaogan batok ni Vietnamese Do Ha Trang aron langkaton ang titulo.

Ang Grade 9 nga estudyante sa Luray II National High School milabni sab og tulo ka silver medals sa team event sa blitz, rapid ug standard.

"Happy kaayo ko," matud pa ni Rubin, nga nakaangkon og katungod nga morepresenta sa Pilipinas sa prestihiyosong kompetisyon tungod sa maanindot niyang salida sa 2024 National Age Group Chess Championships Grand Finals niadtong Hunyo didto sa Dapitan City, Zamboanga del Norte.   

"I'm so thankful sa tanang nakatabang nako nga maka-join sa akong first international tournament ug very thankful ko ni Lord sa pag-    guide sa akoa!" dugang pa niya.

Ang kababayan ni Rubin nga si Kaye Lalaine Regidor gikan sa Sta. Rosa, Laguna nakadaog sab og gold sa girls 16 Under division.

Ang ilang kadaogan nakasalbar sa nasud gikan sa pagkabokya og gold ning usa ka semanang pinug-anay sa utok nga gisalmotan og dekalibreng mga magduduwa og ahedres gikan sa Myanmar, Vietnam, China, Indonesia, Japan, Hong Kong, New Zealand, India, Singapore, Russia, South Korea, Thailand, ug Brunei.

Si Atty. Jeah Jean Gacang, ang team owner sa Toledo-Xignex Trojans Chess Club nga mitabang paggiya sa karera ni Rubin, way kasudlan sa iyang kalipay tungod sa nakab-ot ni Rubin sa una pa lamang niining pag-asdang sa langyawng lapyahan. "Nothing beats the power of prayer, combined with the power of resilience and determination.

When God sees and hears the desires of your heart and your passion for something, He will surround you with people who will help you achieve it," suwat pa ni Gacang sa iyang Facebook.

Si Gacang mitunol sa mainiton niyang pasalamat ngadto sa tanang mga nakatampo sa pagbyahe ni Rubin ngadto sa kalamposan ilabi na ang Toledo LGU ubos sa liderato nilang mayor Joie Perales ug vice mayor Jay Sigue.

"It was a roller coaster ride but all worth it! Thank you everyone we made it! To God be all the Glory!" panapos pa ni Gacang.