2 pang Mpox cases naitala

MANILA, Philippines — Nakapagtala pa ang Department of Health (DOH) kahapon ng dalawang bagong kaso ng mpox (dating monkeypox).

Ang dalawang bagong kaso ng mpox, na parehong mas mild na MPXV Clade II, ay naitala sa National Capital Region (NCR) at sa Calabarzon.

“The total case count is now 14 since July 2022. Nine cases have long recovered since 2023. Five are active cases waiting for symptoms to resolve,” ayon sa DOH.

Ang mpox case 13 ay isang 26-anyos na babae mula sa NCR na nakitaan ng sintomas noong Agosto 20, 2024, gaya ng rashes sa mukha at likod, na may kasamang lagnat. Nagpakonsulta sa doktor ang pasyente at kaagad na nag-isolate sa bahay. Malaunan ay nakitaan siya ng mga karagdagang rashes sa kanyang pubic area, braso at katawan, gayundin ng pamamaga ng lalamunan at ng lymph nodes sa leeg.

Inaalam pa ng DOH ang mga eksaktong sirskumstansiya ng sample collection at tinutukoy pa rin ang mekanismo ng close, intimate, at skin-to-skin contact ng pasyente, na hindi naman umano bumiyahe, may tatlong linggo bago magsimulang lumabas ang kanyang mga sintomas. Hindi na rin umano nag-ikot pa ang pasyente nang magkasakit.

Natukoy na ang dalawang close contact ng pasyente. Hindi pa naman sila nakikitaan ng mga sintomas.

Samantala, ang mpox case 14 ay isang 12-anyos na lalaki mula sa Calabarzon na nilagnat noong Agosto 10. Nagkaroon siya ng rashes sa mukha, hita, katawan at pubic area, na kumalat sa ibang bahagi ng katawan, ubo at namaga ang lymph nodes sa groin area.

Nagpakonsulta ang pasyente sa isang rural health unit noong Agosto 23. Wala rin umano siyang anumang travel history, tatlong linggo bago nagsimula ang kanyang mga sintomas ng sakit.

Ang dalawang bagong pasyente ay kapwa nagpapagaling na sa kani-kanilang mga tahanan.