Ginebra nanoktok sa korona sa PBA

CEBU, Philippines —  Sila si Justin Brownlee ug Scottie Thompson mikuha og atensiyon sa dihang gipiog sa Barangay Ginebra Kings ang TNT Tropang Giga, 73-66, sa Game 5 aron pagposte og 3-2 nga bentaha sa best-of-seven PBA Commissioner's Cup finals niadtong Dominggo sa gabii didto sa Smart Araneta Coliseum.

Si Brownlee padayong mihimo og impresyon bisa'g dunay gihambin nga angol sa tuo niyang kumagko uban ang 18 puntos, 16 niini iyang gibubo sa first half, 14 ka rebounds ug lima ka assists.

Mirehistro sab og double-double si Thompson nga mitimbre og 16 puntos ug 10 ka rebounds samtang sila si Maverick Ahanmisi ug Japeth Aguilar miamot og 11 puntos matag usa alang sa Gin Kings, nga nanginahanglan na lang og usa ka daog aron sakmiton ang gihandum nilang kampiyonato.

Makab-ot kini sa Ginebra kon mapatikangkang nila sa hingpit ang TNT sa Game 6 karong Miyerkules,

Marso 26, didto gihapon sa Big Dome.

Ang TNT miabante unta og 10 puntos, 45-35, sa halftime apan naposasan sila sa Ginebra ngadto lamang sa 21 puntos sa second half.

Sikit na kaayo ang engkwentro sa duha ka kampo sukad nakatabla ang mga sakop ni coach Tim Cone, 47-47.

Katapusang naglabaw ang Tropang Giga sa iskor nga 66-65 sa pinal nga kuwatro minutos gumikan kay sila si Thompson ug Brownlee mipasud sa sunod-sunod nilang mga tira aron aswaton ang Gin Kings ngadto sa krusyal nga daog.