Kanhi opisyal sa Dakbayan sa Danao gipangita tungod sa gun running
CEBU, Philippines — Usa ka kanhi opisyal sa Dakbayan sa Danao ang gipangita sa otoridad samtang tulo ka mga sakop niini ang nadakpan sa gihimong buy-bust operation sa pagpamaligya og dili lisensyadong armas niadtong Marso 21, 2025 sa Barangay Suba, Danao City.
Ang maong operasyon gipangulohan sa Regional Special Project Unit(RSPU) pinaagi sa pakig-alayon sa Regional Mobile Force Battalion (RMFB)-7.
Wala pa hinuon hinganli sa kapolisan kun kinsa ning kanhi opisyal sa maong siyudad samtang nagpadayon ang manhunt operation batok kaniya.
Human sa pila ka buwan nga intelligence gathering ug surveillance malampuson nga nadakpan ang mga suspetsado ug nasakmit ang pipila ka mga armas. Nasakmit sa otoridad ang tulo ka units sa .45 kalibre pistola nga dunay unom ka magazines; usa ka unassembled unit sa KG9 machine pistol nga dunay duha ka KG9 magazines ug usa ma unassembled unit sa Black Widow 9mm pistol.
Ang mga nadakpan giingong miyembro sa gunrunning syndicate nga responsable sa distribusyon o pagpamaligya og loose firearms sa criminal groups nga nag-operate dili lang sa Central Visayas apan apil na sa ubang parte sa Pilipinas.
Hugot nga gi-monitor sa otoridad ang ilang kalihukan gumikan sa hulga nga gihatag nila sa public safety ug security.
“This successful operation is part of our intensified campaign to dismantle illegal firearms networks and prevent weapons from falling into the wrong hands. We will not stop until all individuals involved are held accountable," matud ni PRO-7 Regional Director Police Brigadier General Redrico Maranan.
Ang tulo ka mga suspetsado kasohan og kalapasan sa Republic Act No. 10591 kun Comprehensive Firearms and Ammunition Regulation Act in relation to the Omnibus Election Code. — /IBM (BANAT NEWS)
- Latest
