Kaayo bugti sa kadaotan

Sa pagsulod ni kanhi Presidente Rodrigo Duterte sa prisohan sa International Criminal Court (ICC) sa The Hague gahapon sa kadlawon (sa oras sa Pilipinas), nisugat ang hamugaway nga selda nga siya rang usa ang mag-okupar, dunay higdaanan, lababo, ug pansayan. Makagamit sab sa mas dakong luna para sa ehersisyo.

Lahi sa mga prisohan sa Pilipinas atol sa iyang administrasyon nga gitam-okan og mga piniriso, kansang gidaghanon niabot og hangtod kaupat pil-a ang kapasidad, nga walay klarong tubig, pagkaon, ug ubang batakang kahimanan.

-o0o-

Pagtugpa sa iyang gisakyang private jet sa Rotterdam The Hague Airport, gihatagan si Duterte sa Philippine Embassy og winter clothes ug mga ilisan ug personal nga mga panginahanglan. Iyang abogado, kanhi executive secretary Salvador Medialdea, gihatagan sa Netherlands og 15 ka adlaw nga visa ug gitugotan pagduaw dayon niya sa prisohan.

Lahi sa mga dinakpan sa iyang pamunoan, ang pipila gidagit ug ang uban natsambahang nakalikay sa tokhang, nga gipangulata, gipanglugos ang kababayen-an, gikandadohan sa ngiob nga mga selda ug wala tugoting maduaw sa mga abogado ug mga paryente.

-o0o-

Gipahibawo siya sa kadagkoan sa prisohan nga makapili og mga abogado ug kon wala siyay kuwarta ang ICC mohatag niya og abogado gikan sa iyang grupo sa defense counsels. Duna say computer ug telepono pagtawag sa iyang mga abogado bisan unsang orasa sa adlaw ug gabii.

Lahi sa pag-apiki ni kanhi senador Leila de Lima. Gawas nga gipriso og kapin sa unom ka tuig ginamit ang pekeng mga ebidensiya, gidid-an pag-apil sa mga sesyon sa Senado, ug gihikawan og telepono. Maong napugos pagkinamot sa iyang mga balaudnon.

-o0o-

Sulod sa prisohan, maka-eskuyla siya pagkat-on og bag-ong mga pinulongan ug ubang mga kurso nga mapilian. Lahi sa iyang mga piniriso sa Davao ug Pilipinas nga iyang gikondenar nga mga hayop ug giyatakan ang mga tawhanong katungod.

Gipasaligan sa ICC sa iyang kahimsog ug tanang kahigayonan pagpanalipod sa iyang kaugalingon. Lahi sa mga gipang-ihaw sa extrajudicial killings nga wala gani pahibaw-a unsay pasangil batok nila. Hinaot nga ang kaligdong sa institusyon ug kamakiangayon sa pag-atiman niya makapukaw ni Duterte sa ka-mangtas sa iyang binuhatan ug sa panginahanglan pagpaningil niya. Aron mahatagan og hustisya ang mga biktima.