MANILA, Philippines — Nakapagtala na ang Department of Health (DOH) ng 17 firework-related injuries (FWRI) cases sa bansa, kaugnay nang nalalapit na pagdiriwang ng Pasko at Bagong Taon.
Ang bilang ay mula Disyembre 22-23, 2024 sa 62 ospital na kanilang binabantayan sa buong bansa.
Sa mga naturang kaso, 16 ang lalaki na nagkakaedad ng 7-37 taong gulang habang isa naman ang babae, na nasa 20-taong gulang.
Kaugnay nito, mahigpit ang paalala ng DOH sa publiko na iwasan ang paggamit ng anumang uri ng paputok. Mas makabubuting gumamit ng mga alternatibong pampaingay tulad ng tambol, torotot, at iba pa.
Hinikayat din naman ng DOH ang mga magulang na pagbawalan ang mga bata sa pagpapaputok.
“Maaaring tawagan ang National Emergency hotline sa numerong 911 at 1555 naman para sa DOH hotline sakaling mangailangan ng tulong,” ayon pa sa DOH. “Disiplina ay kailangan para masaya at Ligtas Christmas sa Bagong Pilipinas!”