P1.2 milyong ecstasy, marijuana samsam sa Pasay
MANILA, Philippines — Umaabot sa P1.2 milyong halaga ng marijuana at ecstasy ang nasamsam ng mga tauhan ng Philippine National Police–Drug Enforcement Group mula sa isang ‘tulak’ sa Pasay kahapon ng madaling araw sa Pasay City.
Batay sa ulat ni PNP-PDEG Director, PBrig. Gen. Eleazar Matta, nakatanggap ng tip ang kanilang tanggapan hinggil sa bentahan ng illegal na droga.
Agad na ikinasa ang buy-bust operation kung saan aabot sa 700g ng marijuana gayundin ng 100 tablets ng hinihinalang ecstasy ang nasabat ng kanyang mga tauhan sa bahagi ng Service Road, Roxas Boulevard sa Pasay City.
Arestado naman ang isang pinaniniwalaang ‘tulak’ na ngayon ay nasa kustodiya na ng kanilang Special Operations Unit–National Capital Region.
Dinala na sa PNP Forensic Group sa Kampo Crame ang mga nasabat na iligal na droga para isailalim sa laboratory examination.
Sasampahan ng kasong paglabag sa Republic Act 9165 o Comprehensive Dangerous Drugs Act of 2002 ang suspek.
- Latest
