SSS members na may late payments, kakalampagin sa text

MANILA, Philippines — Sinimulan na ng Social Security System (SSS) ang pagpapadala ng text messages sa mga miyembro nito na mayroong mga late payments o lampas na ng due date sa pagbabayad ng kanilang short-term loans.

Ayon kay SSS Senior Vice President for Len­ding and Asset Management Group Pedro Baoy, ito ay para mabigyan ng tsansa ang mga miyembro na makapag-renew ng kanilang mga loans.

“SSS will now regularly issue these messages to its loan borrowers, ensuring they are promptly reminded whenever they miss their loan payments or have loans that have remained unsettled after its maturity,” pahayag ni Baoy.

Hinikayat ni Baoy ang mga miyembro ng SSS na mag-log in sa My.SSS account para suriin ang kanilang mga loans.

Sa kabila nito, ­nilinaw ni Baoy na hindi naman makatatanggap ng notifications ang mga miyembro na regular na nagbabayad ng monthly loan amortization.

Payo ni Baoy, kung hindi makikita sa Check loan records ng My.SSS account, maaari namang magtungo at magtanong sa e-centers na matatagpuan sa lahat ng tanggapan ng SSS.

Hinimok din ni Baoy ang mga miyembro na may short-term loans na samantalahin ang Consolidation of Past Due Short-Term Member Loans with Condonation of Penalty (Conso Loan) para mapadali ang pagbabayad.