Foreman, patay sa pagsabog ng acetylene tank

MANILA, Philippines — Isang foreman ang nasawi nang sumabog ang isang acetylene tank habang nagwe-welding sa Quiapo, Manila, kahapon ng umaga.

Ang biktimang si Emilio Esplago, foreman ng Alleyway Construction, ay binawian ng buhay bunsod ng tinamong mga sugat sa iba’t- ibang bahagi ng katawan dulot ng pagsabog.

Batay sa ulat ng Barbosa Police Station 14 (PS-14) ng Manila Police District (MPD), dakong alas-10:40 ng umaga nang maganap ang insidente sa Estero De Quiapo, na matatagpuan sa Arlegui St., sa Quiapo.

Sa imbestigasyon ni PSSg Jeus Cris Jacalne, lumilitaw na kasalukuyan umanong ginagamit ng biktima ang isang welding machine nang maganap ang pagsabog na nagresulta sa matinding pagkasugat nito at pinsala sa lugar.

Naisugod pa ang biktima sa Jose Reyes Memorial Hospital ngunit binawian din ng buhay.